Qazaqstan halqy Assambleıasy Petropavldaǵy separatızm faktisine oraı málimdeme jasady

PETROPAVL. QazAqparat - Qazaqstan halqy Assambleıasy «Narodnyı Sovet Petropavlovsk» dep atalatyn uıymnyń atynan shyqqan bir top adamnyń arandatýshylyq málimdemesin qatań aıyptady, dep habarlaıdy QazAqparat.

«Biz, Qazaqstan halqy Assambleıasynyń ókilderi, Qazaqstan Respýblıkasynyń aýmaqtyq tutastyǵynyń myzǵymastyǵyn jáne oǵan ishki jáne halyqaralyq zańnamammen kepildik berilgenin málimdeımiz. Bul áreketterdi memleketimizdiń konstıtýtsııalyq negizderine, qaýipsizdigine, birligi men turaqtylyǵyna qarsy baǵyttalǵan el múddesine jasalǵan opasyzdyq dep baǵalaımyz. Biz birtutas halyq retinde qazaqstandyq qoǵamda eshkimniń arazdyq pen senimsizdik taratýyna jol bermeımiz» delingen uıymnyń málimdemesinde.

Assambleıa mundaı arandatýshylyqtar asa jaýapsyzdyqtyń kórinisi jáne quzyrly organdar tarapynan qatań tyıylýy kerek dep esepteıdi.

Kináliler sot tártibimen zań aıasynda jazalanýy tıis.

«Qazaqstan halqy Assambleıasy azamattardy mundaı áreketterge boı aldyrmaýǵa jáne myzǵymas birligimiz ben qoǵamdyq kelisimimizdiń negizi – halqymyzǵa tán danalyqty, tózimdilikti, senim men ózara syılastyqty saqtaýǵa shaqyrady. Qazaqstan – bizdiń ortaq shańyraǵymyz jáne biz qaı jerde bolsaq ta súıikti Otanymyzdyń ókilderimiz, al halyqaralyq qaýymdastyq bizdi birtutas ári qýatty ult retinde tanıdy. Biz ártúrlimiz, biraq birligimiz áralýandylyqta. Bul qaǵıdadan biz eshqashan aýytqymaımyz» deıdi uıym músheleri.

Eske sala keteıik, búgin Bas prokýratýra SQO-da separatızmdi nasıhattaý isine qatysty tergeý bastalǵanyn habarlaǵan bolatyn.