Qazaqstan halqy Assambleıasy N.Nazarbaevty prezıdenttik saılaýdaǵy jeńisimen quttyqtady
"Qazaqstan halqy Assambleıasy Sizdi jáne Siz arqyly - barsha Qazaqstan halqyn 2015 jylǵy prezıdent saılaýyndaǵy aıqyn jeńisińizben quttyqtaıdy", - dedi Assambleıa Tóraǵasynyń birinshi orynbasary Eraly Toǵjanov Elbasy N.Á.Nazarbaevtyń jeńisine arnalǵan Qazaqstan halqy Assambleıasynyń saltanatty jınalysynda. - Qazaqstan halqy tarıhı tańdaý jasady jáne el damýynyń eń kúrdeli kezeńderinen memleketti senimdi túrde alyp shyqqan óziniń Elbasyna daýys berdi. Sizdiń saıası kóshbasshylyǵyńyz búgingi kúni qalyptasqan ǵalamdyq ahýaldan jáne memleket damýy men Qazaqstan halqynyń qalaýynan týyndaıtyn mindetterdiń obektıvti balamasyz sheshimi dep málimdeımiz. Saılaý nátıjeleri Sizdiń tolyq, talassyz bedelińizdi kórsetti".
Jıynǵa QHA músheleri, QHA Keńesi, QR Parlamentiniń depýtattary, respýblıkalyq etnomádenı birlestikterdiń jetekshileri, QHA ǵylymı saraptamalyq keńesiniń músheleri, BAQ ókilderi qatysqan bolatyn. Olar biraýyzdan, ótken saılaý Qazaqstan halqynyń birligin jáne tutastyǵyn, óz taǵdyryn derbes sheshýge degen yntasyn kórsetti dep baǵalap otyr.
"Daýys berýshiler sany el tarıhynda buryn bolmaǵan rekordtyq kersetkishke ıe boldy. Qazaqstan halqy keleshek aldyndaǵy jaýapkershiligin sezine otyryp, halyq pen eldiń bıik múddesin eskerip, azamattyq jáne patrıottyq paryzyn oryndaý maqsatynda tańdaý jasady. Bul tańdaý halyqtyń kóshbasshysy - Elbasy, Qazaqstan Respýblıkasynyń Prezıdenti Nursultan Ábishuly Nazarbaevtyń jeńisine aınaldy! Bul - Qazaqstan halqynyń jeńisi!" - dep atap ótti Assambleıa tóraǵasynyń orynbasary.
Eske sala keteıik, 2015 jyldyń 14 aqpanynda Qazaqstan halqy Assambleıasy Keńesi men QHA keńesiniń músheleri qatysqan otyrystyń qorytyndysynda, Qazaqstan halqyna kezekten tys QR Prezıdenti saılaýyn ótkizý jóninde bastama kótergen bolatyn.
