Qazaqstan halqy Assambleıasy Qazaqstan qoǵamynyń mańyzdy ınstıtýttarynyń birine aınaldy - N. Nazarbaev
ASTANA. Mamyrdyń 1-i. QazAqparat /Ernur Aqanbaı/ - Táýelsiz damý jyldary ishinde Qazaqstan halqy Assambleıasy Qazaqstan qoǵamynyń mańyzdy ınstıtýttarynyń birine aınaldy. Búgin Astanada Qazaqstan halqynyń birligi merekesimen quttyqtaý sózinde Elbasy Nursultan Nazarbaev osylaı atap kórsetti,
dep habarlaıdy QazAqparat.
«Qazaqstan halqy Assambleıasy ultaralyq kelisimdi, turaqtylyqty nyǵaıtýda mańyzdy ról atqarýda. Assambleıamen barlyq qazaqstandyqtar maqtana alady. Assambleıa bıyl 15 jyldyǵyn atap ótedi. Ol osy jyldar ishinde álemdegi barlyq halyqtar úshin úlgi bola alatyn organǵa aınaldy», dedi Prezıdent.
Elbasy Astanadaǵy Beıbitshilik pen kelisim saraıy ultaralyq jáne etnıkaaralyq toleranttylyqtyń jarqyn sımvoldarynyń birine aınalǵanyn atap kórsetti. «Álemdik jáne dástúrli dinder basshylarynyń sezderi ótkizilýiniń arqasynda bizdiń elordamyz ásem Astanany búginde búkil álem biledi, oǵan úmitpen qaraıdy. Álemdik jáne dástúrli dinder basshylarynyń sezderi álemniń birde-bir elinde joq biregeı jınalys. Bundaı sezder bizdiń elimizde ótkizilip jatqanynyń ózindik sebepteri bar. Sebebi biz kópultty, kóp konfessııaly el beıbitshilik pen kelisimde ómir súre alatynyn jáne ózderiniń dinı muqtajdyqtaryn esh alańsyz, eshkimnen qoryqpaı jasaı alatynyn jarqyn mysalymyzben dáleldep otyrmyz. Al, álemde halyqtarǵa tynysh ómir súrýge múmkindik bermeı otyrǵan sansyz qantógisterdiń, qaqtyǵystardyń mysaly jeterlik», dedi N. Nazarbaev.
