Qazaqstan halqy Assambleıasy Elbasynyń halyqqa Joldaýyna qatysty óz ustanymdaryn saralap aldy
ASTANA. Qańtardyń 29-y. QazAqparat /Jasulan Amanbaıuly/ - Búgin Úkimet úıinde Qazaqstan halqy Assambleıasy Elbasynyń halyqqa Joldaýyn talqylap, soǵan oraı óz ustanymdaryn belgiledi,
dep habarlaıdy QazAqparat.
Elbasy N. Nazarbaevtiń búgingi halyqqa Joldaýynan keıin Qazaqstan halqy Assambleıasynyń jáne ulttyq birlestikterdiń músheleri ondaǵy kórsetilgen mindetter men maqsattardy talqylaýǵa arnalǵan keńeske jınaldy.
Qazaqstan halqy Assambleıasy Tóraǵasynyń orynbasary Eraly Toqjanov Qazaqstan Prezıdenti Nursultan Ábishulynyń Joldaýynda aıtylǵan basymdyqty baǵyttardyń ishinde ultaralyq kelisimdi saqtaý, ulttyq qaýipsizdikti kúsheıtý, halyqaralyq qatynastardy damytý máselelerie erekshe toqtalyp ótti.
«Memleket basshysy elimizdiń Ulttyq strategııasyn jasaqtaýdy tapsyrdy. Dostyq pen birlikti saqtaý jáne ony memlekettiligimizdiń kepili retinde qaraý, sonymen qatar árbir qazaqstandyqtyń ekonomıkalyq ósimge óz úlesin qosýy, álemdik naryqqa jáne aımaqtyq ekonomıkalarǵa otandyq naryqty yqpaldastyrý máseleleri belgilendi. Osy taqyryptarǵa bizdiń de qosar isimiz bolady dep sanaımyn», deıdi E. Toǵjanov.
«Osy Joldaýdan keıin bizdiń qazaqstandyqtardyń sana-sezimin tárbıeleý jáne qalyptastyrý qajet degen qorytyndyǵa keldim. Memleketimizdiń qandaı ekonomıkasy bolmasyn, tek bizdiń kópultty elimizdegi beıbit ómir, tózimdilik, turaqtylyq jáne birin-biri túsinisý qabiletine ıe bola bilý - Qazaqstannyń órkendeýine kepil bola alady», dedi Koreı mýzykalyq komedııa teatrynyń dırektory Nı Lıýdmıla.
Qazaqstan halqy Assambleıasy músheleriniń aıtýynsha, onda eń negizgi jaıttardyń biri bul isti qoǵamdyq baqylaýǵa alý. Bul Assambleıaǵa tikeleı qatysy bar óte mańyzdy máselelerdiń biri dep sanaıdy jınalǵandar.
Keńes otyrysynyń sońynda Qazaqstan halqy Assambleıasy el halqyna arnaǵan úndeýin jarııalady.
