Qazaqstan halqy 2050 jylǵa qaraı 28 mln adamǵa jýyqtaıdy

ASTANA. QazAqparat – Qazaqstan halqynyń sany 2050 jylǵa qaraı 8,2 mln adamǵa ósip, 27,8 mln adamǵa jetedi. Bul týraly QazAqparat Eńbek resýrstaryn damytý ortalyǵyna silteme jasap habarlaıdy.

Ortalyqtyń uzaq merzimdi boljamyna qaraǵanda,.ósý qarqyny jylyna 1,1-1,4% sheginde ózgeredi, ortasha jyldyq ósý qarqyny (OJÓQ) 1,3%, optımıstik nusqasynda – 1,4-1,7% (OJÓQ 1,5%), pessımıstik nusqasynda – 0,7-1,1% (OJÓQ 0,9%).

2022-2050 jyldary jańa týǵan náresteler sany 14,3 mln adamdy, qaıtys bolǵandar sany 5,5 mln adamdy quraıdy. Osylaısha, tabıǵı ósim 8,8 mln adamdy quraıdy. Alaıda, kóshi-qonnyń teris saldosyna baılanysty (565 myń adam) 2050 jylǵa qaraı halyqtyń taza ósimi 8,2 mln adamdy quraıdy.

Qosymsha sharalarsyz halyqtyń óńirara birkelki bólinbeýi kúsheıtiletin bolady. 2050 jylǵa qaraı segiz óńirdiń halyq sany 869 myń adamǵa qysqarýy múmkin, olardyń qataryna Abaı (92 myńǵa), Aqmola (80 myńǵa), Qaraǵandy (99 myńǵa), Qostanaı (181 myńǵa), Pavlodar (100 myńǵa), Soltústik Qazaqstan (182 myńǵa), Ulytaý (15 myńǵa), Shyǵys- Qazaqstan (120 myńǵa) oblystary kiredi.

Sonymen qatar qalǵan óńirlerdegi halyq sany 9 mln adamǵa ósýi múmkin, onyń ishinde Astana, Almaty jáne Shymkent qalalarynda 4,2 mln adamǵa ulǵaımaq. Budan bólek halyq sanynyń ósýi Aqtóbe (326 myń), Almaty (800 myń), Atyraý (350 myń), Batys Qazaqstan (112 myń), Jambyl (657 myń), Jetisý (512 myń), Qyzylorda (328 myń), Mańǵystaý (723 myń) jáne Túrkistan (994 myń adamǵa) oblystarynda kútiledi.