«Qazaqstan halqy 20 mıllıonǵa jetýge tıis!» - respýblıkalyq basylymdarǵa sholý

***

Keshe Memleket basshysy Nursultan Nazarbaev elordanyń jańa ákimshilik ortalyǵyndaǵy perzenthananyń ashylý rásimine qatysty. Osyǵan oraı «Aıqyn» gazetiniń juma kúngi sanynda «Qazaqstan halqy 20 mıllıonǵa jetýge tıis!» degen kólemdi maqala jaryq kórdi. Shara barysynda Elbasy «búkil ekonomıka, memleket qurýdaǵy isimiz, barlyq qamqorlyǵymyz adamdarymyzdyń deni saý bolýyna, qazaqstandyqtardyń qatary artýyna baǵyttalǵan. Men halqymyzdyń sanyn 20 mıllıonǵa deıin jetkizý týraly mindet qoıdym», deıdi óz sózinde.

 «Rım Papasy qazaq tilinde quttyqtaıdy». Osy taqyryppen «Aıqyn» basylymynda shaǵyn maqala jaryq kórdi. Basylymnyń QR Syrtqy ister mınıstrliginiń baspasóz qyzmetine silteme jasap habarlaýynsha, Rım Papasy Benedıkt 16-shy erteń Vatıkanda  búkil álemge Rojdestvo merekesine oraı quttyqtaý joldaıdy, onyń ishinde quttyqtaý qazaq tilinde de bolmaq. Sonymen qatar osy basylymnyń Prezıdent Ákimshiliginiń baspasóz qyzmetine silteme jasap habarlaýynsha, Memleket basshysy N.Nazarbaev Máskeý jáne Búkil Reseı Patrıarhy Kırıllmen telefon arqyly sóılesken. Áńgimelesý barysynda Qazaqstan Prezıdenti Orys Pravoslavııa shirkeýiniń basshysyn kelesi jyldyń basynda elimizge kelip qaıtýǵa shaqyrǵan.

«Aıqyn» gazetiniń dástúrli «Aq sóıle!» aıdarynyń búgingi qonaǵy ekonomıka ǵylymynyń doktory, akademık Muqtar Tinásili. Ekeýara áńgime «Qazaqstanǵa sý sharýashylyǵy mınıstrligi kerek» degen taqyryppen berilgen. Basylymnyń san-salany qamtyǵan saýaldaryna tuşymdy jaýap bergen akademık «Qazaqstan 2009 jyldy unamdy kórsetkishtermen aıaqtaǵaly otyr. Bıylǵy jyldyń ózinde júzden asa ınvestıtsııalyq jobalar júzege asyryldy. Ózimiz lokomotıv, kombaın, traktor, jańa munaı, hımııa jáne metallýrgııa ónimderin shyǵara bastadyq», depti.

***

Osydan eki kún buryn Elbasy Nursultan Nazarbaev «Egemen Qazaqstan» gazeti redaktsııasynyń jańa ǵımaratyn ashyp, basylym ujymyn, onyń ardagerleri men myń san oqyrmandaryn  gazettiń  90 jyldyǵymen quttyqtady. Bul aıtýly shara elimizdiń bas basylymynyń tuńǵysh nómiri jaryq kórýiniń 90 jyl tolýyna oraılastyryldy. Osyǵan oraı atalǵan basylymda «Bas basylymnyń jańa ǵımaraty» atty maqala jaryq kórdi. Jarııalanymda «Sońǵy onshaqty jyl­dyń ishinde gazettiń taralymy 38 myń­nan 150 myńǵa jetkeni, ıaǵnı tórt ese óskeni, torqaly toı qarsańynda redak­tsııanyń segiz qabatty jańa ǵımara­ty­nyń óz ýaqtysynda jáne sapaly turǵyzylýy aktsıonerlik qoǵam basshylyǵynyń zaman talabyna saı jumys isteı biletindiginiń belgisi, gazet menedjmentin aıtarlyqtaı jaqsarta alǵanynyń arqasy», degen Memleket basshysynyń sózi keltirilgen. Ǵımarattyń ashylý saltanatyna Mem­lekettik hatshy - Syrtqy ister mınıstri Qanat Saýdabaev, Prezıdent Ákimshiliginiń Basshysy Aslan Mýsın, «Nur Otan» HDP Tóraǵasynyń birinshi orynbasary Nurlan Nyǵmatýlın, Prezıdent Ákimshiligi Basshysynyń orynbasary Máýlen Áshimbaev jáne Mádenıet jáne aqparat mınıstri Muhtar Qul-Muhammed qatysqan.

«Ekonomıkalyq jetistikter jańa belesterge bastaıdy». Osy taqyryppen Parlament Májilisiniń depýtaty Ramazan Sárpekov «Egemen Qazaqstan» basylymynyń beısenbilik sanynda kólemdi maqala beripti. Onda «Qazaqstan-2030» Stra­te­gııa­lyq damý baǵdarlamasynyń qa­byl­dan­ǵanyna bıyl on eki jyl tolǵandyǵy aıtylyp, onyń eli­miz­diń da­mýyna qandaı áser-yq­paly bol­ǵany týraly baıandalǵan.

«Búginde qarjylyq jáne ekonomıkalyq daǵdarys sózi keń taraǵan sózge aınalyp otyr. Degenmen, eldiń úreıin ushyryp, qapylysqa túsirgen osynaý qubylystyń ekinshi jaǵyna úńilsek qaıter edi? Daǵdarys «sebebimen» aýyldaǵylar etek-jeńin jınap, sharýasyn ońtaılaı túsýde. «Úkimet kómektesedi» dep bárin ózgeniń moınyna ile salmaı, ysyrapshyldyqtan arylýda. Áleýmettik salaǵa da jetkilikti kóńil bólinip, osylaısha aýyldaǵy aǵaıynnyń esebi túgeldenip otyr. Osyndaı jaqsy úrdister shalǵaı jatqan Mańǵystaý oblysynda da baıqalýda», dep jazady «Egemen Qazaqstan» gazeti. Osyǵan oraı basylym Mańǵystaý oblysynda atqarylyp jatqan is-sharalar tóńireginde Parlament Májilisiniń depýtaty Gúlnar Seıtmaǵambetovamen suhbattasqan. «Sharalar shapaǵaty  alys aýyldarǵa da jetýde» degen taqyryppen ekeýara áńgimeniń tolyq nusqasyn basylymnyń beısenbilik nómirinen egjeı-tegjeıli oqı alasyzdar.

Qazaqstan 2009 jyly qańtardyń 1-inen EQYU tóraǵalarynyń Úshtigine resmı túrde kiristi. Al is júzinde tóraǵa mindetterin Grekııa Qazaqstanǵa jeltoqsannyń 1-inde Afınada ótken EQYU-na múshe memleketterdiń Syrtqy ister mınıstrleriniń keńesinde tapsyrdy. Úshtiktiń negizgi maqsaty - EQYU is-qımyldaryn úılestirý jáne josparlaý. Sonymen qatar Uıym qyzmetindegi sabaqtastyqty qamtamasyz etýde, ári qyzmettegi tóraǵaǵa keńes beretin organ retinde Úshtiktiń mańyzy zor. Osyǵan oraı «Túrkistan» halyqaralyq saıası aptalyǵynyń beısenbilik nómirinde «Bedeldi uıymǵa tóraǵalyqtyń memlekettik astary» atty kólemdi maqala jaryq kórdi.

«Qazaqstan jyldy jaqsy  aıaqtaǵaly otyr, bul - jarqyn jeńis». «Memleket basshysy «Arna Medıa» holdınginiń buqaralyq aqparat quraldary basshylarynyń suraqtaryna jaýap qaıtardy. Aıaqtalyp kele jatqan jyldyń qorytyndylary, eldiń bolashaǵy, til saıasatynyń júzege asyrylýy, sondaı-aq Qazaqstan EQYU men IKU-ǵa tóraǵa kezinde óziniń aldyna qoıatyn mindetter - Memleket basshysy osy kúnderi 90 jyldyǵyn atap ótken «Egemen Qazaqstan» gazeti redaktsııasynda bolǵan kezde respýblıkanyń beldi buqaralyq aqparat quraldarynyń basshylaryna bergen suhbatynyń negizgi taqyryptary, mine, osylar», dep jazady «Egemen Qazaqstan» basylymy. Gazettiń jazýynsha, Qazaqstan basshysyna kókeıkesti suraqtardy «Egemen Qazaqstan» jáne «Kazahstanskaıa pravda» gazetteriniń jetekshileri Saýytbek Abdrahmanov pen Aleksandr Tarakov, «Qazaq aqparat agenttigi» UK» basqarmasynyń tóraǵasy Dáýren Dııarov, «Qazaqstan» teleradıokorporatsııasynyń basshysy Janaı Omarov, «Habar» agenttiginiń basshysy Gúlnár Yqsanova, «Qazaq gazetteri» jáne «Jas órken» jaýapkershiligi shekteýli seriktestikteriniń bas dırektorlary Jumabek Kenjalın men Júsipbek Qorǵasbek, «Arna Medıa» ulttyq aqparattyq holdıngi basqarmasynyń tóraǵasy Erlan Baıjanov qoıdy.

Elbasymen aradaǵy suhbat «Kazahstanskaıa pravda» basylymynda da tolyǵymen jaryq kórgen.

«Egemen Qazaqstan» gazetiniń jazýynsha, Mádenıet jáne aqparat mınıstrligi 2009 jyly jeltoqsannyń 23-inde «Memlekettik áleýmettik tapsyrys máseleleri jónindegi keıbir zańnamalyq aktilerge ózgertýler men tolyqtyrýlar engizý týraly» zań jobasyn ázirleý jónindegi jumys tobynyń birinshi otyrysyn ótkizdi.  Jumys tobynyń quramyna Parlament depýtattary, múddeli memlekettik organdardyń ókilderi jáne kóptegen úkimettik emes uıym­dardyń kóshbasshylary engizildi. Otyrys barysynda Mádenıet jáne aqparat mınıstrliginiń jaýapty hatshysy Janna Qurman­ǵalıeva komıssııa múshelerin memlekettik áleýmettik tapsyrys júıe­sin jetildirý jónindegi mınıstrliktiń jumysymen tanystyrǵan.

«Keshe Qazaqstan Respýblıkasynyń Prezıdenti Nursultan Nazarbaev Astana qalasyndaǵy áleýmettik jáne saýda salasyndaǵy jumysyn jańa bastaǵan birqatar nysandarda boldy», dep jazady «Kazahstanskaıa pravda» gazeti. Basylymnyń jazýynsha, elbasy barǵan nysandardyń biri 150 oryndyq per­zenthana men táýligine 250 adamǵa deıin qabyldaı alatyn áıelder konsýltatsııasy boldy. Bular halyqaralyq standarttarǵa saı jabdyqtalǵan. Sonyń ishinde per­zenthana - «100 mektep, 100 aýrý­hana» baǵdarlamasy sheńberinde salynyp, paıdalanýǵa berilgeli turǵan alǵashqy nysandardyń biri. Munda júkti áıelderge josparly, tótenshe kómekter men konsýl­ta­tsııalar beriledi. Sondaı-aq, gıne­ko­logııalyq naýqastarǵa shaldyqqan áıelder de osy ortalyqtan kómek ala alady. Dúnıejúzilik densaýlyq saqtaý uıymynyń talaby men eýropalyq standarttarǵa sáıkes mundaǵy 15 bosaný palatalary basqalarǵa kórinbeıtindeı etilip, bólek-bólek ornalastyrylǵan. Nysannyń jalpy quny 8,6 mlrd teńgeni quraıdy.

QR Prezıdenti bolǵan nysandar jaıynda egjeı-tegjeıli jazylǵan maqalany «Egemen Qazaqstan», «Aıqyn», «Lıter», «Izvestııa», «Ekspress-K» basylymdarynan da oqı alasyzdar.