Qazaqstan halqy 18 mln 195 myń adamdy qurady
ASTANA. QazAqparat - 2018 jyldyń 1 naýryzynda Qazaqstan halqynyń sany 18 mln 195,9 myń adamdy qurady. Mundaı derekti QR Ulttyq ekonomıka mınıstrliginiń Statıstıka komıteti keltiredi, dep habarlaıdy QazAqparat.
Atalǵan vedomstvo málimetinshe, 2018 jylǵy 1 naýryzǵa elimizdegi halyq sany 18195,9 myń adamdy qurady. Onyń ishinde qalalyqtar - 10452,3 myń (57,4%), aýyldyqtar - 7743,6 myń adam (42,6%). 2017 jylǵy 1 naýryzben salystyrǵanda halyq sany 240,3 myń adamǵa nemese 1,3 paıyz ósti.
2018 jylǵy qańtar-aqpanda respýblıkada 1 jasqa deıingi 587 (2017 jylǵy qańtar-aqpan - 541) náreste ólimi tirkeldi. 2017 jylǵy sáıkes kezeńmen salystyrǵanda 1 jasqa deıingi shetinegen náreste sany 8,5 % kemidi. 2018 jylǵy qańtar-aqpan náreste ólim-jitiminiń koeffıtsıeti 1000 týǵandarǵa shaqqanda 9,31 (8,86) qurady.
Náreste ólim-jitiminiń negizgi sebebi - perınataldyq kezeńde paıda bolatyn jaǵdaılar, budan 2018 jylǵy qańtar-aqpan 261 (260) náreste qaıtys bolyp, náresteler arasyndaǵy jalpy ólim sanynyń 44,5 paıyzyn (48,6%) qurady. Týa bitken aýytqýlardan 138 (122) nemese 23,5% (22,6%), tynys organdary aýrýlarynan - 53 (40) nemese 9,0% (7,4%) jáne jazataıym jaǵdaıdan, ýlanýdan jáne jaraqattan - 23 (40) nemese 3,9,% (7,4%) náreste qaıtys boldy.
2018 jylǵy qańtar-aqpanda Qazaqstanǵa kelgender sany 2017 jylǵy qańtar-aqpanmen salystyrǵanda 17 paıyzǵa kemidi, Qazaqstannan ketkender sany 32,3 paıyzǵa artty.
Elimizdegi negizgi kóshi-qon almasýy TMD memleketterimen bolýda. TMD elderinen kelgenderdiń jáne sol elderge ketkenderdiń úlesi, tıisinshe, 77,2 jáne 88,1 paıyzdy qurady.
El ishinde qonys aýdaratyn kóship-qonýshylar sany 38,4 paıyz kemidi. Óńiraralyq qonys aýdarý boıynsha halyq kóshi-qonynyń oń aıyrymy elimizdiń 2 óńirinde baıqaldy: Astana (3127 adam) jáne Almaty (6668 adam) qalalarynda.
