Qazaqstan halqy 1 jylda 252 myń adamǵa ósti - Statıstıka
ASTANA. QazAqparat - Qazaqstan halqy 1 jylda 252 myń adamǵa ósti. Bul týraly búgin QR Statıstıka agenttiginiń basshysy Álıhan Smaıylov málim etti.
«Bıylǵy jyldyń 1 aqpanynda elimizdegi halyq sany 17 mln. 187 myń adamdy qurady. Onyń 55 paıyzy - qalalyqtar, al 45 paıyzy - aýyldyqtar. 2013 jyldyń 1 aqpanymen salystyrǵanda, ıaǵnı 12 aıdyń ishinde halyq sany 252 myń adamǵa nemese 1,5 paıyzǵa ósti», - dedi ol.
Sonymen qatar, onyń atap ótýinshe, AHAT organdarynda dúnıe esigin ashqan 33 myń sábı tirkelgen. Bul kórsetkish ótken jyldyń qańtar aıymen salystyrǵanda 6,9 paıyzǵa kem. Atalǵan jaıt aǵymdaǵy jyldyń qańtarynda 2013 jylǵy qańtarǵa qaraǵanda kesh tirkelý faktileri sanynyń az bolýyna oraı oryn alǵan.
«Qaıtys bolǵandar sany 12,2 myń adamdy qurady nemese 2013 jylǵy qańtarǵa qaraǵanda 13,5 paıyzǵa kemidi», - dedi Á.Smaıylov.
