Qazaqstan halqy 1 qańtarda 18 mln 157 myńǵa jetti
Esepti kezeńde qalalyq jerlerde turatyn halyqtyń sany 10 mln 426,5 myńǵa (57,4%) jetip, aýyldarda 7730,6 myńdy (42,6%) qurady.
AHAT organdarynyń málimetinshe, byltyr 390,5 myń sábı ómirge kelgen, bul kórsetkish byltyrǵyǵa qaraǵanda 4,7%-ǵa az. Myń adamǵa shaqqandaǵy jalpy týý koeffıtsıenti 21,65 sábı bolyp otyr.
Respýblıka halqynyń tabıǵı ósimi 2016 jylmen salystyrǵanda 17 myń adamǵa nemese 6,1%-ke qysqaryp, 260,5 myńdy, al myń adamǵa shaqqandaǵy tabıǵı ósim 14,44-ti qurady.
Esepti kezeńde 130 myń adam qaıtys boldy. Bul byltyrǵy kórsetkishten 1,8%-ke az. Byltyr respýblıkada 1 jasqa deıingi 3150 náreste (10,6%-ǵa az) shetinegen. Náreste ólim-jitiminiń negizgi sebebi - perınataldyq kezeńde paıda bolatyn jaǵdaılar. Budan 2017 jylǵy qańtar-jeltoqsanada 1586 náreste qaıtys bolyp, náresteler arasyndaǵy jalpy ólim sanynyń 50,3% qurady. Týa bitken aýytqýlardan 731 nemese 23,2%, tynys organdary aýrýlarynan - 195 nemese 6,2% jáne jazataıym jaǵdaıdan, ýlanýdan jáne jaraqattan - 168 nemese 5,3% náreste qaıtys boldy. 2017 jylǵy qańtar-jeltoqsanda náreste ólim-jitiminiń koeffıtsıeti 1000 týǵandarǵa shaqqanda 8,07 qurady.
Kóshi-qon qyzmeti organdary usynǵan málimetterge sáıkes, 2017 jylǵy qańtar-jeltoqsanda elimizge turǵylyqty turýǵa kelgenderdiń tirkelý sany 2016 jylǵy qańtar-jeltoqsanmen salystyrǵanda 20,5%-ke kóbeıip, 16 081-di quraǵan. Elimizden ketkenderdiń sany 7,8%-ke kóbeıip, 37 704-ti qurady.
TMD elderinen kelgenderdiń úlesi jalpy kóship kelýshilerdiń 72,1%-in, al TMD elderine ketkenderdiń úlesi 89,4%-ti qurady.
Óńiraralyq kóship-qonýshylardyń úlesine elimizdiń jalpy ishki kóship-qonýshylar sanynyń 35,4%-in kurady. Óńiraralyq kóshi-qonnyń oń aıyrymy Astana qalasynda (36 449 adam), Almaty qalasynda (31 775 adam) jáne Aqmola oblysynda (1 544 adam) baıqaldy.
