Qazaqstan halqynyń sany boıynsha jańartylǵan derekter jarııalandy

ASTANA.KAZINFORM — 2026 jylǵy 2 aqpanda Ulttyq statıstıka bıýrosy Qazaqstan halqynyń sanyna qatysty jańartylǵan statıstıkalyq málimetterdi usyndy. 

Resmı derekterge sáıkes, 2026 jylǵy 1 qańtardaǵy jaǵdaı boıynsha Qazaqstan halqynyń jalpy sany 20 495 975 adam boldy.

Onyń ishinde, áıelder — 10 477 240 adam, erler — 10 018 735 adam.

Bıýro málimetinshe, eldegi qalalyq halyq sany 13 029 803 adamǵa jetse, al aýyldyq halyq sany 7 466 172 adam bolǵan.

— 2025 jyldyń basymen (20 283 399 adam) salystyrǵanda halyq sany 212 576 adamǵa artqan. Ósimniń negizgi sebepteri tabıǵı ósim — 196 423 adam, kóshi-qon saldosy — 16 153 adam, — delingen habarlamada.

Statıstıkaǵa sáıkes, halyq sany eń kóp óńirler qatarynda burynǵydaı 7 óńir kósh bastap tur.

Atap aıtqanda, Almaty qalasy — 2 347 924 adam, Túrkistan oblysy — 2 148 658 adam, Astana qalasy — 1 638 233 adam, Almaty oblysy — 1 596 331 adam, Shymkent qalasy — 1 293 648 adam, Jambyl oblysy — 1 215 373 adam, Qaraǵandy oblysy — 1 131 287 adam.

Sondaı-aq halqy eń az úsh óńirdiń tizimi ózgerissiz qaldy. Olar ulytaý oblysy — 218 993 adam, Soltústik Qazaqstan oblysy — 514 156 adam, Abaı oblysy — 595 676 adam.

Buǵan deıin byltyr qarasha aıynda elordadaǵy halyq sany 1,6 mıllıon adamnan asqan. Halyqtyń jyl saıynǵy ósimi qalaǵa júktemeni arttyryp, úlken jaýapkershilikti júkteıdi. Bul týraly Astana qalasynyń ákimi Jeńis Qasymbek eseptik kezdesýinde aıtqan edi.