Qazaqstan halqynyń neshe paıyzy ushaqpen qatynap júr

ASTANA. KAZINFORM – Kólik mınıstrligi Kazinform saýalyna joldaǵan jaýapta Qazaqstan halqynyń neshe paıyzy azamattyq avıatsııanyń qyzmetin turaqty túrde paıdalanatynyn aıtty.

- 2023 jyldyń qorytyndysy boıynsha qazaqstandyq áýe kompanııalary 13,3 mln jolaýshy tasymaldady. Demek, bir jylda Qazaqstandaǵy 20 mln halyqtyń 66,5%-y áýe tasymalyn paıdalandy, - dep jazylǵan resmı málimette.

Basqasha aıtsaq, ár avıa jolaýshy bir jylda orta eseppen 1 947 shaqyrym joldy ushaqpen eńsergen.

- 2023 jyly jolaýshylar aınalymy 25 898,5 mln jolaýshy/shaqyrym boldy. 2023 jyly 1 adamǵa alǵanda ortasha eseppen 1 947 km keledi, - delingen jaýapta.

Mınıstrlik esep júrgizý tásilin kelesideı túsindiredi: 

- Kórsetkishter «Kólik statıstıkasy kórsetkishterin qalyptastyrý boıynsha ádistemesin bekitý týraly» Qazaqstan Respýblıkasy Ulttyq ekonomıka mınıstrligi Statıstıka komıteti tóraǵasynyń 2016 jylǵy 15 shildedegi №145 buıryǵynyń negizinde qalyptastyrylady. Kólik statıstıkasy kórsetkishterin qalyptastyrý boıynsha ádisteme halyqaralyq standarttarǵa sáıkes qalyptastyrylatyn jáne «Memlekettik statıstıka týraly» Qazaqstan Respýblıkasynyń Zańyna sáıkes bekitiletin statıstıkalyq ádisnamaǵa jatady.

Buǵan deıin «Qazaeronavıgatsııa» respýblıkalyq memlekettik kásiporny Qazaqstan aspanynan qansha tabys taýyp otyrǵanyn jazǵan edik.