Qazaqstan halqynyń qansha paıyzy Prezıdentke senim artady
ASTANA. KAZINFORM – Memleket basshysyna halyqtyń senim deńgeıi turaqty túrde joǵary qalpyn saqtap tur. Bul týraly QR Prezıdenti janyndaǵy Qazaqstannyń strategııalyq zertteýler ınstıtýty jarııalaǵan áleýmettanýlyq saýalnama nátıjesinde aıtylǵan.
— Memleket basshysyna degen senim deńgeıi - 80,5%, ıaǵnı turaqty túrde joǵary bolyp qala beredi. Jastar arasynda bul kórsetkish 86,4%-ǵa, al qazaqtar arasynda 82,2%-ǵa jetedi. Áıelder men aýqatty toptar da senimdiliktiń joǵary deńgeıin kórsetedi. Azamattardyń turaqty senimi saıası reformalardyń, áleýmettik qoldaýdyń jáne ekonomıkalyq sharalardyń nátıjesimen baılanysty bolýy múmkin, - dedi QSZI sarapshysy Gúlnaz Qasymova.
Áleýmettanýlyq zertteýlerdiń nátıjeleri kórsetkendeı, qazaqstandyqtardyń 66,2%-y 2024 jyldy jaqsy kóńil kúımen jáne optımıstik kózqaraspen aıaqtaýda. Kórshi elder men Taıaý Shyǵystaǵy áskerı qaqtyǵystar sııaqty jahandyq syn-qaterlerge qaramastan, Qazaqstan turǵyndary ótken jylǵa oń baǵa bergen.
Sondaı-aq, saýalnamaǵa qatysqan el azamattarynyń 77,7 paıyzy 2024 jylǵy Qazaqstannyń saıası damý baǵytyn qoldaǵan. Bul kórsetkish el basshylyǵynyń ishki jáne syrtqy saıası sheshimderi el tarapynan maquldaýǵa ıe bolǵanyn kórsetedi.
Áleýmettanýshy, QSZI sarapshysy Aıgúl Zabırova bundaı saýalnama júrgizilerde áýeli jalpy halyqtyń qansha paıyzy jastar, qanshasy orta jas, qanshasy kári kisiler ekeni eskerilip, saýalnama respondentteri de dál sol paıyzdyq proportsııamen irikteletinin aıtady. Osylaısha saýalnama nátıjesiniń barynsha shynaıylyǵy aıqyndalady.
