Qazaqstan halqynyń 60,9 paıyzy otbasyn qurǵan, 5,8 paıyzy — ajyrasqandar

Ulttyq statıstıka bıýrosy sanaq kezinde alynǵan neke jáne otbasyna qatysty málimetti jarııalady, dep habarlaıdy Kazinform. 

Ulttyq statıstıka bıýrosy 2021 jylǵy halyq sanaǵynyń qorytyndysy boıynsha neke jáne otbasy, sondaı-aq úı sharýashylyqtary boıynsha kezekti jınaqty shyǵardy.

Onda aımaqtar, jynys jáne jas quramy bólinisindegi kórsetkishterdi, sondaı-aq sońǵy eki sanaq arasyndaǵy dınamıkalyq ózgeristerdi kórýge bolady. 

Nekede turǵan erler men áıelderdiń sany 2009 jyly 6,6 mıllıonnan 2021 jyly 8,2 mıllıonǵa deıin ósti

2021 jylǵy sanaq qorytyndysy boıynsha halyqtyń 60,9% nekede bolǵan, osylaısha nekede turǵan azamattardyń sany — 8,2 mln adam.

Onyń ishinde 9% — qaıta neke qurǵandar.

Jalpy halyqtyń 28% — eshqashan úılenbegen, 5,3% — jesir, al qalǵan 5,8% — ajyrasqandar.

Úı sharýashylyqtarynyń sany 27,9% ósti

Sanaq nátıjesi úı sharýashylyqtary sanynyń 27,9% óskenin kórsetti — 2009 jylǵy 4,3 mln birlikten 2021 jyly 5,6 mln birlikke deıin.

Qalalyq jerlerde úı sharýashylyqtarynyń 3,7 mln (66,4%), aýyldyq jerlerde — 1,8 mln (33,6%) birligi esepke alyndy.

Qazaqstan boıynsha úı sharýashylyqtarynyń ortasha mólsheri 3,4 adamdy qurady.

Bul rette aýyldyq jerdegi úı sharýashylyqtarynyń ortasha mólsheri qalalyq jerlerge qaraǵanda artyq, tıisinshe 3,9 jáne 3,1 adamnan.

Úı sharýashylyqtarynyń eń joǵary ortasha mólsheri Mańǵystaý, Atyraý, Qyzylorda jáne Túrkistan oblystarynda baıqaldy — 4,3-ten 5,2 adamǵa deıin.

Aıta keteıik, Almaty, Shyǵys Qazaqstan, Qaraǵandy oblystary boıynsha derekter sanaq ótken ýaqytqa, ıaǵnı olar bólingenge deıin berilgen.