Qazaqstan halqynyń 35 paıyzy — bala

ASTANA. KAZINFORM — Oqý-aǵartý mınıstrligi balalardyń quqyǵyn qorǵaý komıtetiniń tóraǵasy Nasymjan Ospanova balalardyń aqparattyq, tsıfrlyq qaýipsizdigi máselesin kóterdi.

— Elimizde balalardyń sany 7 mıllıonǵa jýyqtady, bul halyqtyń 35 paıyzy. Bala quqyqtary týraly konventsııaǵa sáıkes, memleket kámeletke tolmaǵandardyń psıhıkalyq jáne fızıkalyq saýlyǵyna zııan keltirýi múmkin aqparattar men materıaldarǵa qol jetkizýin boldyrmaýy tıis. Osy oraıda 2023 jyly Oqý-aǵartý mınıstrligi ıÝNISEF birlesip zertteý júrgizdi. Zertteýdiń maqsaty — balalardyń tsıfrlyq saýattylyǵyn tekserip, ınternetten kelýi múmkin qaýipterdi anyqtaý. Nátıje alańdatarlyq bolyp shyqty, — dedi Nasymjan Ospanova.

Balalardyń quqyǵyn qorǵaý komıteti basshysynyń aıtýynsha, aqparat balanyń psıhıkasyna aıtarlyqtaı áser etedi. Kez kelgen aqparattyń eki qyry bar. 

— Jaǵymsyz aqparattarǵa kelsek, balanyń oıyn ózgertedi jáne burmalaıdy, qııalyna yqpal etedi, jańa minez-qulyq úlgisin qalyptastyrady, sonyń saldarynan onyń psıhıkalyq jáne psıho-emotsıonaldyq densaýlyǵyna zııan keledi. Odan bólek, balalar arasyndaǵy zorlyq-zombylyq, jeke derekti qoldaný qaýpi bar, — deıdi ol.

Búgin elordada LGBT nasıhattyń balalar men jasóspirimderge áserin zertteý nátıjesi talqylandy. Atalǵan sharaǵa sarapshylar, ǵalymdar, memlekettik organdar ókilderi, depýtattar men qoǵamdyq uıymdar ókilderi qatysty. 

Aıta keteıik, zertteý nátıjesinde belgili bolǵandaı, qazaqstandyq jasóspirimderdiń 10-12 paıyzy beıtanys adammen kezdesýge barǵanyn moıyndaǵan. 

Buǵan deıin Qazaqstanda LGBT nasıhatqa qylmystyq jaýapkershilik engizý usynysy týraly jazǵan edik. 

Sondaı-aq Májilis depýtaty Edil Jańbyrshın LGBT nasıhattyń 73 paıyzy áleýmettik jeliden tarap jatqanyn aıtyp, dabyl qaqty. 

Eske salaıyq, saýalnama nátıjesine sáıkes, qazaqstandyqtardyń 80 paıyzy LGBT nasıhatty zańmen shekteýdi qoldaıdy.