Qazaqstan halqyna qorynan aýyl balalaryna jazǵy lagerge joldamalar taratyldy
ASTANA. KAZINFORM – «Qazaqstan halqyna» qoǵamdyq qorynyń «QH Jazdyq joldama-2024» qaıyrymdylyq jobasy boıynsha búgin Qazaqstannyń barlyq óńirinde aýyl mektepteriniń dırektorlaryna 5-8 synyp oqýshylarǵa arnalǵan jazǵy demalysqa sertıfıkattar tabystaldy. Atalǵan shara 14-23 naýryz aralyǵynda ótip jatqan «Naýryznama» merekelik onkúndigi aıasynda uıymdastyryldy.
Jazǵy demalysqa joldama 10-14 jas aralyǵyndaǵy aýyl mektepterinde oqýda, sportta, shyǵarmashylyqta joǵary kórsetkishterge qol jetkizgen, mektep ómirine belsene atsalysyp júrgen, az qamtylǵan, kóp balaly, áleýmettik osal jáne basqa da sanattaǵy otbasylardan shyqqan 20 000 balaǵa beriledi.
Sertıfıkattardy saltanatty tapsyrý rásimi kórkemónerpazdardyń qatysýymen 2 860 aýyldyq mektepte, sondaı-aq 1 046 aýyldyq okrýgter men aýdan ákimdikterinde ótti. Jaqsylyq marafonymen jalpy sany 3 876 aýyldyq mektep qamtyldy. Qaıyrymdylyq is-sharasy balalar men ata-analar úshin jáne jergilikti atqarýshy organdardyń ókilderi, jalpy jurtshylyq úshin naǵyz merekege aınaldy.
«Balalarǵa berilgen joldamany kóktem meıramy qarsańynda jáne «Naýryznama» baǵdarlamasy aıasynda ár aýdan men mektepterde tabystaýdy uıǵardyq. Mundaı is-sharalar Naýryz meıramynyń óskeleń urpaq úshin qundylyqtaryn nyǵaıtýǵa, sondaı-aq qaıyrymdylyq ıdeıalaryn nasıhattaýǵa yqpal etedi dep sanaımyz», - dedi «Qazaqstan halqyna» qory basqarma tóraǵasynyń orynbasary Lázzat Shyńǵysbaeva.
«Jobanyń seriktesi – Oqý-aǵartý mınıstrligi. Vedomstvo balalardyń jazǵy demalysynyń baǵdarlamasyn, krıterıılerin, qyzmet kórsetýshilerdi irikteý men baqylaý tetikterin anyqtaıdy. Aýyldyq mektepter óńirdegi bilim basqarmalarymen birlesip oqýshylar arasynda jazǵy demalysqa joldamalardy irikteý men bólýdi qamtamasyz etedi.
Aqparatta aıtylǵandaı, «QH Jazdyq joldama-2024» qaıyrymdylyq jobasynyń bıýdjeti – 2,1 mlrd teńge. Joba tek aýyldyq jerlerdegi balalar men jasóspirimderge baǵyttalǵan. Óskeleń urpaqtyń boıynda shabyt pen patrıotızmdi arttyryp qana qoımaı, kópmádenıetti ortada qarym-qatynas pen ómirlik qajetti daǵdylardy nyǵaıtady, sondaı-aq kásiptik baǵdarlaý men olardyń básekege qabilettiligin kúsheıtý elementine aınalady.
