«Qazaqstan halqyna» qory «Samuryq-Qazynadan» áli qarajat almaǵan

«Qazaqstan halqyna» qoryna aýdarylatyn aqsha qordyń shottarynda rezervke qoıylǵan. Muny brıfıngi barysynda «Samuryq-Qazyna» ulttyq ál-aýqat qorynyń Ekonomıka jáne qarjy jónindegi teń basqarýshy dırektory Mırat Ótepov aıtty, dep habarlaıdy Kazinform.

«Bekitiligen erejege saı, qor taza tabysynyń 7 paıyzy kóleminde aqsha bólýi kerek. Bul soma 67 mlrd teńgege teń. Ol aqsha qordyń shottarynda rezervke qoıylǵan. Qazir «Qazaqstan halqyna» qory birneshe jobany bekitti, endi ishki protsesterin ótkizip jatyr. Olarǵa qaı kezde aqsha qajet bolady, biz sol kezde qarajatty bólýge daıynbyz. Ázirge suranys túsken joq. Oǵan deıin aqsha aınalymda bolýy kerek qoı», - dep jaýap qatty Mırat Ótepov Kazinform tilshisiniń saýalyna oraı.

Eske salaıyq, buǵan deıin «Samuryq-Qazyna» «Qazaqstan halqyna» qoryna 2022 jylǵy tabysynan 66,6 mlrd teńge bóletinin jazyp edik.