«Qazaqstan halqyna» qory: Bilim grantyn ıelengen 220 talapkerdiń tizimi shyqty
ASTANA. KAZINFORM — 2026 jyly «Qazaqstan halqyna» qorynyń bilim berý granttaryna 220 talapker ıe boldy.
2026–2027 oqý jylynda joǵary jáne joǵary oqý ornynan keıingi bilim berý uıymdarynyń (JJOKBU) 38 uıymynan 220 talapker «Qazaqstan halqyna» qoǵamdyq qorynyń bilim berý granttaryna ıe boldy.
Bilim berý granttary baǵdarlamasy Qor tarapynan 2022 jyldan beri júzege asyrylyp keledi jáne aýyldyq jerlerdegi, shaǵyn jáne monoqalalardaǵy jastardy qoldaýǵa baǵyttalǵan.
Bıylǵy oqý jylynda granttar talapkerlerdiń úsh sanatyna bólindi:
60 grant — aýyldyq jerlerden, shaǵyn jáne monoqalalardan shyqqan jetim balalarǵa jáne kámeletke tolǵanǵa deıin ata-anasynyń qamqorlyǵynsyz qalǵan balalarǵa;
53 grant — aýyldyq jerlerden, shaǵyn jáne monoqalalardan shyqqan múgedektigi bar adamdarǵa;
107 grant — aýyldyq jerlerden, shaǵyn jáne monoqalalardan shyqqan, 18 jasqa deıingi múgedektigi bar balalardy tárbıelep otyrǵan otbasylardan shyqqan talapkerlerge.
— Bilim berý granttaryn berý týraly sheshim Qordyń Qamqorshylyq keńesiniń 2026 jylǵy 22 maýsymdaǵy № 105 sheshimimen bekitilgen «Qazaqstan halqyna» qoǵamdyq qorynyń bilim berý granttaryn berý tujyrymdamasyna jáne 2026 jylǵa arnalǵan talapkerlerdi irikteý modeline sáıkes qabyldandy. Іrikteý qorytyndysy boıynsha grant taǵaıyndalatyn talapkerlerdiń tizimi Qor Basqarmasynyń 2026 jylǵy 9 qyrkúıektegi № 34 sheshimimen bekitildi, — delingen habarlamada.
Qor bir akademııalyq oqý jylyna 1 mln teńgege deıingi mólsherde oqý aqysyn tóleıdi, sondaı-aq oqý jylynyń 10 aıy ishinde aı saıyn 60 myń teńge kóleminde stıpendııa tóleıdi. Ótken jyldarmen salystyrǵanda stıpendııa mólsheri 1,5 esege — 40 myńnan 60 myń teńgege deıin ulǵaıtyldy.
Baǵdarlama iske qosylǵan 2022 jyldan beri «Qazaqstan halqyna» qorynyń bilim berý granttaryna barlyǵy 4 511 jas qazaqstandyq ıe boldy. Ótken oqý jylynda 721 túlek oqýyn aıaqtap, suranysqa ıe mamandyqty meńgerýge jáne kásibı jolyn bastaýǵa múmkindik aldy.
«Qazaqstan halqyna» bilim berý granttary — stýdentterge kórsetiletin qarjylyq qoldaý ǵana emes. Bul — adamı kapıtalǵa salynǵan ınvestıtsııa, sondaı-aq óńirlerdegi jastarǵa sapaly joǵary bilim alyp, óz áleýetin ashýǵa jáne eldiń damýyna úles qosýǵa múmkindik beretin mańyzdy qoldaý tetigi.
Qor bilim alýǵa teń múmkindikter qalyptastyrý jáne jas qazaqstandyqtardy qoldaý baǵytyndaǵy jumysyn jalǵastyrýda. Bilim berý granty kóptegen jastar úshin derbes bolashaqqa bastaıtyn mańyzdy qadamǵa aınalyp otyr.
«Qazaqstan halqyna» qorynyń bilim berý granttary ıegerleriniń tizimin kórý úshin siltemege ótý kerek.
Buǵan deıin «Qazaqstan halqyna» qoǵamdyq qory 2026-2027 oqý jylyna talapkerlerdiń joǵary oqý oryndarynda bilim alýyna 350 bilim berý grantyn bólgenin jazǵanbyz.
