«Qazaqstan halqyna» qory 350 bilim grantyn bóldi: kimder úmitker bola alady
ASTANA. KAZINFORM – «Qazaqstan halqyna» qoǵamdyq qory 2026-2027 oqý jylyna talapkerlerdiń joǵary oqý oryndarynda bilim alýyna 350 bilim berý grantyn bóldi, dep habarlaıdy Ǵylym jáne joǵary bilim mınıstrligi.
Grantqa aýyldyq eldi mekenderdegi, shaǵyn jáne monoqalalardaǵy mektepterdiń 25 jasqa deıingi túlekteri úmitker bola alady.
Baǵdarlama jetim balalar men kámeletke tolǵanǵa deıin ata-anasynyń qamqorlyǵynsyz qalǵan azamattarǵa, múgedektigi bar tulǵalarǵa, sondaı-aq múgedektigi bar balalardy tárbıelep otyrǵan otbasylardyń balalary men ata-anasynyń múgedektigi bar talapkerlerge arnalǵan.
– Bilim berý grantynyń ıegerlerine oqý aqysy jylyna 1 mıllıon teńgege deıin tólenedi. Sonymen qatar oqý kezeńinde aı saıyn 60 myń teńge kóleminde shákirtaqy taǵaıyndalady. Shákirtaqy jyl saıyn jazǵy demalys kezeńin qospaǵanda 10 aı boıy tólenedi, – delingen habarlamada.
Grantqa úmitkerlerdiń tizimin baǵdarlamaǵa qatysatyn joǵary oqý orny nemese onyń fılıaly qalyptastyrady. Іrikteýge UBT tapsyryp, oqýǵa túsý úshin belgilengen eń tómengi ótý balyn jınaǵan talapkerler qatysa alady. Shyǵarmashylyq bilim berý baǵdarlamalary boıynsha shyǵarmashylyq emtıhan nátıjeleri de esepke alynady.
Úmitkerler tizimi joǵary oqý ornynyń konkýrstyq komıssııasy otyrysynyń hattamasymen rásimdeledi.
Baǵdarlamaǵa qatysatyn joǵary oqý oryndarynyń tizimi, ár JOO-ǵa bólingen grant sany jáne olardy berý tártibi «Qazaqstan halqyna» qoǵamdyq qorynyń resmı saıtynda jarııalanǵan.
Aıta keteıik, ákimdik granttaryna qujat qabyldaý bastaldy.
