«Qazaqstan halqyna» Qoǵamdyq qoryn Lázzat Shyńǵysbaeva basqarady

ASTANA. KAZINFORM — «Qazaqstan halqyna» Qoǵamdyq qoryn úsh jyl boıy basqarǵan Bolat Jámishev qyzmetinen ketti, dep habarlaıdy qordyń baspasóz qyzmeti.

Лаззат Чинкисбаева
Фото: "Қазақстан халқына" қоры

Ol bul qyzmetke 2022 jyldyń qańtarynda taǵaıyndalǵan bolatyn. Basqarma tóraǵasy bolyp saılanǵan ókilettik merziminiń aıaqtalýyna baılanysty Bolat Jámishev Qordaǵy jumysyn aıaqtaý týraly sheshim qabyldady.

Basshylyq jasaǵan kezinde Bolat Jámishev Qordyń qalyptasýy men damýyna zor úles qosty. Qor 104 qaıyrymdylyq baǵdarlamasy men jobasyna bastamashy bolyp, onyń 62-sin iske asyrdy. 29 qańtarda QR Prezıdenti janyndaǵy Ortalyq kommýnıkatsııalar qyzmeti alańynda Qor Basqarmasynyń músheleriniń qatysýymen ótken brıfıngte «Qazaqstan halqyna» qorynyń jumys nátıjeleri týraly baıandady.

Qordyń qaıyrymdylyq jobalary densaýlyq saqtaý júıesin damytýdyń, aýyldaǵy bilim berý men eldegi áleýmettik qoldaýdyń, jańa standarttardy belgileýdiń jáne qazaqstandyqtardyń ómir súrý sapasyn túbegeıli ózgertýdiń draıverine aınaldy.

Qor men onyń seriktesteriniń qoldaýymen aýdandyq jáne oblystyq ońaltý ortalyqtaryn damytýdy, shaǵyn jınaqty mektepterde jańa bilim berý tehnologııalaryn qoldanýdy qosa alǵanda, aýyldyq jerlerdegi tirek mektepter jelisin qurý, robototehnıka kabınetterin damytý, az qamtylǵan otbasylardan shyqqan stýdentter úshin bilim granttaryn iske qosý, ınnovatsııalyq targetti preparattar men zamanaýı medıtsınalyq jabdyqtardy satyp alý sııaqty mańyzdy bastamalar júzege asyryldy. Shalǵaı eldi mekenderde sportpen shuǵyldaný úshin Qordyń qoldaýymen aýyl jastaryna arnalǵan 100 sport zaly ashyldy. Batys Qazaqstan oblysynda 25 aýyldyq kitaphana jańartylyp, aýyldyq komıýnıtı ortalyqtaryna aınalýda.

Qor Atyraý, Batys Qazaqstan, Soltústik Qazaqstan, Qostanaı, Aqmola oblystarynda sý tasqynynan zardap shekken 627 otbasy úshin turǵyn úı qurylysyn qarjylandyrýdy qamtamasyz etti.

Qazaqstan Prezıdenti Qasym-Jomart Toqaev, Aqordanyń resmı saıtynda jarııalanǵan aqparatqa sáıkes, «Qazaqstan halqyna» Qorynyń jumysyn joǵary baǵalady. Memleket basshysy Qordyń azamattardy áleýmettik qoldaýǵa jáne qoǵamnyń ál-aýqatyn arttyrýǵa qosqan qomaqty úlesin atap ótip, bul baǵyttaǵy qyzmetti jalǵastyrýdyń mańyzdylyǵyna toqtaldy.

Bolat Jámishev
Foto: "Qazaqstan halqyna" qory

— Qorda jumys isteý men úshin úlken mártebe jáne jaýapkershilikti is boldy. Qor qyzmetinde bizdiń bastamalarymyzdy qoldaǵandardyń barlyǵyna shyn júrekten alǵys aıtamyn. Biz birigip aıtarlyqtaı nátıjelerge qol jetkizdik jáne Qordyń jańa basshylyqpen óz damýyn jalǵastyra beretinine senimim mol. Barlyq seriktesterge, donorlarǵa jáne qyzmetkerlerge ortaq ıgi isimizge qosqan úlesi úshin alǵys aıtamyn, — dep Bolat Jámishev óz sheshimine túsinik berdi.

«Qazaqstan halqyna» Qoǵamdyq qory Qamqorshylyq keńesiniń sheshimimen 2025 jyldyń 1 aqpanynan bastap «Qazaqstan halqyna» QQ Basqarma tóraıymy laýazymyna qoǵam qaıratkeri, qaıyrymdylyq jáne Qazaqstandaǵy ÚEU-nyń ınstıtýtsıonaldyq damýy men áleýmettik jobalardy basqarý salasyndaǵy sarapshy Lázzat Shyńǵysbaeva saılandy. Ol buǵan deıin «Qazaqstan halqyna» qory Basqarma tóraǵasynyń orynbasary qyzmetin atqaryp, memlekettik nagrada — «Eren eńbegi úshin» medalimen, «Atameken» UKP qurmetti qyzmetkeri» medalimen marapattalǵan.

Sondaı-aq, Qamqorshylyq keńes qor qyzmetkerleri Sofııa Aısaǵalıevany Basqarma tóraǵasynyń orynbasary, Serikbek Elshibekovti «Qazaqstan halqyna» QQ Basqarma múshesi etip saılady.

Basshylyqtyń aýysqanyna qaramastan, Qor jumysyn qalypty tártipte jalǵastyrady. Qordyń Qamqorshylyq keńesiniń pikirinshe, basshylyqtyń aýysýy — bul jańa taraý, ol qaıyrymdylyq qyzmetti damytý úshin qosymsha múmkindikterdi ashady.

Eske salsaq, osyǵan deıin Áset Núsipov Saýda jáne ıntegratsııa vıtse-mınıstri bolyp taǵaıyndalǵanyn jazǵan edik.

Сейчас читают