«Qazaqstan halqyna» qoǵamdyq qory Batys Qazaqstanda 114 turǵyn úı salmaq

ORAL. KAZINFORM — «Qazaqstan halqyna» qoǵamdyq qory men BQO ákimdigi Batys Qazaqstan oblysynyń Syrym aýdanynda sý tasqynynan zardap shekken otbasylar úshin turǵyn úıler salý týraly memorandýmǵa qol qoıdy.

Memorandým aıasynda qordyń qarjy resýrstary esebinen jergilikti atqarýshy organdar usynǵan úlgilik joba negizinde 114 turǵyn úı salynady. Atalǵan qordan túsken málimetke qaraǵanda, Syrym aýdany Jympıty aýylynda – 49, Buldyrtyda – 25, Óleńtide – 38, Jetikólde – 1 jáne Jańaqonysta 1 úı boı kótermekshi. Osy eldi mekenderde sý tasqynynan zardap shekken sonshama úı obektıvti tekserý qorytyndysy boıynsha jóndeýge jatpaıdy jáne turýǵa jaramsyz.

Batys Qazaqstan oblysynyń ákimdigi sý baspaıtyn aýmaqtarda jańa úıler salý úshin jer ýchaskelerin anyqtady jáne bóldi. Sondaı-aq qajetti ınjenerlik ınfraqurylymdy júrgizedi. Oryndalatyn qurylys jumystarynyń barysy men sapasyn oblys ákimdigi jergilikti qoǵamdyq belsendilermen birlesip baqylaıtyn bolady.

«Bizdiń jerimiz, halqymyz tabıǵı apatqa tap boldy, onyń saldary, árıne óte aýyr. Biraq, biz ortaq kúsh-jigerimizben qysqa merzimde jańa úıler qurylysyn bastap, olardy tolyqtaı bitirip, qıynshylyqqa tap bolǵan otandastarymyzǵa kómektese alamyz dep úmittenemiz. Qor buǵan qamqorshylyq keńestiń sheshimi boıynsha 10 mlrd teńgeni bólýmen birge qaıyrymdy qazaqstandyqtar men bıznes ókilderi jiberip otyrǵan qarajatty qosymsha qarastyryp otyr», - dep atap ótti «Qazaqstan halqyna» QQ tóraǵasynyń orynbasary Lázzat Shyńǵysbaeva.

Sonymen qatar jaqyn ýaqytta Soltústik Qazaqstan, Qostanaı, Aqtóbe jáne Aqmola oblystarynda qurylys úshin aýyldar men aýmaqtar anyqtalyp, tıisti memorandýmǵa qol qoıylady.

«Memleket basshysy sý tasqynynan zardap shekken turǵyndardy baspanamen qamtýdy tapsyrǵan bolatyn. Osy rette, «Qazaqstan halqyna» qory da kómek kórsetkeli otyr. Osylaısha, oblysymyzdyń Syrym aýdanynda turǵyn úıler salynady. Bul – qýantarlyq jaǵdaı. Zardap shekken turǵyndar baspanasyz qalmaıdy, memleket tarapynan barynsha kómek beriledi» — dedi BQO ákimi Narıman Tóreǵalıev.

«Eskeretin jaıt, 1-30 sáýir aralyǵynda qordyń atyna túsken barlyq aqshalaı qarajat tótenshe jaǵdaıdyń saldaryn joıýǵa jáne aýyldyq jerlerde turǵyn úı salýǵa baǵyttalatyn bolady. Qor óziniń resmı saıtynda donorlar men atalǵan somalardyń mólsheri týraly esepti ornalastyrady. Kúni búgin qordyń shottaryna 2,9 mlrd teńge kóleminde qaıyrymdylyq jarnalary tústi. Qor sáýir aıynyń sońyna deıin qaıyrymdylyq qarajaty esebinen salynatyn úılerdiń sany artady dep úmittenedi. Qor qaıyrymdylyq úshin tek qordyń resmı saıtynda kórsetilgen shottar men derektemelerdi paıdalanýdy suraıdy. Jeke tulǵalar aýdarymdardy bankterdiń mobıldi qosymshalarynda «Qaıyrymdylyq» bólimi arqyly júzege asyra alady», - dep habarlady vedomstvodan.

Eske sala keteıik, budan buryn Batys Qazaqstanda turýǵa jaramsyz dep tanylǵan 400-ge jýyq úı qaıta salynatynyn jazǵan bolatynbyz.

BQO-da qutqarýshylar sý ortasynan jylqylardy alyp shyqty.

Oralda eki er adam birneshe kún boıy sý basqan saıajaıda qalyp qoıǵan.

Jaıyq ózenindegi sý deńgeıi Oral qalasy tusynda tómendedi.