Qazaqstan halqy mıkroqarjy uıymdaryna 2,9 trln teńge nesıe qaryz

ASTANA. KAZINFORM — Qazaqstan ekonomıkasyndaǵy kredıtterdiń jalpy jıyntyǵy 42,8 trln teńgege jetti. Ulttyq banktiń kezekti statıstıkalyq málimetinde osyndaı derek bar.

Ulttyq bank málimetine súıensek, Qazaqstan ekonomıkasyndaǵy kredıt beresheginiń jıyntyq somasy 2024 jyldyń 1 sáýirinen bastap bir jyldyń ishinde 20,4% ulǵaıyp, 2025 jylǵy 1 sáýirde 42,8 trln teńge bolǵan. Bul somanyń 19,5 trln teńgesi (45,6%) qarjylyq emes zańdy tulǵalar men dara kásipkerlerdiń moınynda. 23,3 trln teńgesi (54,4%) halyqtyń moınynda. 

Nesıelerdi qaı valıýtada alynǵanyna kelsek, 90,6%-y (38,7 trln teńge) tól valıýtamen, 9,4%-y (4 trln teńge) shetel valıýtasymen berilgen. Joǵaryda aıtylǵan 42,8 trln teńge bereshektiń 85,6%-yn (36,6 trln teńge) bankter bergen. 2024 jyldyń 1 mamyrynda bul soma 30,9 trln teńge bolǵan.

«Qazaqstandyq turǵyn úı kompanııasy» AQ, «Ekspress Fınans» Ipotekalyq uıymy» AQ sııaqty ıpoteka uıymdaryna tólenýi kerek nesıelerdiń jalpy kólemi — 271,7 mlrd teńge (2024 j. 1 mamyrynda — 289,5 mlrd teńge bolǵan). «Agrarlyq kredıttik korporatsııa» AQ, «QazAgroQarjy» AQ, «Ónerkásipti damytý qory» AQ, «Qazyna Kapıtal Menedjment» AQ sııaqty kvazımemlekettik sektor nysandaryna qaıtarylýy kerek kredıt mólsheri — 2,9 trln teńge (2024 j. 1 mamyrynda –2,2 trln teńge bolǵan).

Mıkroqarjy uıymdary taratqan nesıelerdiń jalpy somasy — 2,9 trln teńge. 2024 jyldyń 1 mamyrynda bul soma 2,5 trln teńge bolǵan. ıAǵnı, bir jyldyń ishinde halyqtyń mıkroqarjy uıymdary aldyndaǵy nesıe bereshegi 400 mlrd teńgege ulǵaıǵan.

Buǵan deıin Qarjylyq monıtorıng agenttigi turǵyndarǵa tıimsiz shartpen qaryz bergen mıkroqarjy uıymyn tekserip jatqanyn jazǵan edik.