Qazaqstan halqy bankterge 50 trln teńgege jýyq aqsha jınady
ASTANA. KAZINFORM — Qazaqstanda depozıtter kólemi artyp keledi. 2026 jylǵy 1 tamyzdaǵy jaǵdaı boıynsha zańdy jáne jeke tulǵalardyń bankterdegi depozıtteri bir aıda ósip, jalpy kólemi 50 trln teńgege jýyqtady.
Qarjy naryǵyn retteý jáne damytý agentteginiń málimetinshe, zańdy tulǵalardyń depozıtteri bir aıda 1,8% ósip, 22,5 trln teńgege, al jeke tulǵalardyń depozıtteri 1,3% artyp, 28,4 trln teńgege jetti.
Ulttyq valıýtadaǵy depozıtter kólemi de ulǵaıǵan. Bir aıda teńgedegi depozıtter 2,3% ósip, 41,2 trln teńge boldy. Al shetel valıýtasyndaǵy depozıtter 1,5% azaıyp, 9,7 trln teńgege deıin tómendedi. Agenttik muny, basqa faktorlarmen qatar, teńgeniń AQSh dollaryna qatysty 1,5%-ǵa nyǵaıýy aıasyndaǵy qaıta baǵalaýmen túsindiredi.
Osynyń nátıjesinde depozıtterdiń dollarlaný deńgeıi de tómendedi. 2026 jylǵy 1 tamyzda bul kórsetkish 19,1% boldy. Maýsym aıynda dollarlaný deńgeıi — 19,7%.
Sonymen qatar bankterdegi depozıtter boıynsha syıaqy mólsherlemeleri de ózgergen. Banktik emes zańdy tulǵalardyń teńgedegi merzimdi depozıtteri boıynsha ortasha ólshengen mólsherleme shildede 15,9% boldy. Maýsymda bul kórsetkish 16,2% edi.
— Al jeke tulǵalardyń depozıtteri boıynsha mólsherleme ózgermeı, 14,7% deńgeıinde saqtaldy. Bankterdiń menshikti kapıtaly da ósken. Shildede ol 1,9% artyp, 11,4 trln teńgege jetti. Jyl basynan beri bankterdiń kapıtaly 7,6%-ǵa ulǵaıǵan, — delingen habarlamada.
2026 jyldyń basynan beri bankterdiń taza paıdasy 1,396 trln teńge boldy. Degenmen bul byltyrǵy osy kezeńmen salystyrǵanda 14,9% az.
1 tamyzdaǵy jaǵdaı boıynsha bank aktıvteriniń rentabeldiligi (ROA) 3,5%, al kapıtaldyń rentabeldiligi (ROE) 23,2% boldy.
Eske salaıyq, buǵan deıin el halqynyń bankterge qaryzy 26 trln teńgeden asqanyn jazǵanbyz.
