Qazaqstan halqy Assambleıasynyń týy ǵaryshqa jóneltiledi

ASTANA. KAZINFORM - Qazaqstan halqy Assambleıasynyń 30 jyldyǵyna arnalǵan emblema men «Astana jastary» logotıpi bar týlar halyqaralyq ǵarysh stansasyna jetkiziledi. 

Roskosmos 2 ǵaryshkeri men NASA-nyń 1 ǵaryshkeri mingen «Soıýz MS-27» ǵarysh kemesi 8 sáýir kúni ushyrylady. Bul týraly «Assambleıa jastary» birlestiginiń tóraǵasy Tımýr Jumyrbaev QHA keńesiniń otyrysynda aıtty. 

— Biz qazir bul máseleni 7-8 sáýir kúnderi Qyzylorda oblysynda ótetin QHA jastary forýmy aıasynda pysyqtaımyz. Forým qatysýshylary ǵarysh kemesin ushyrý sátin tamashalaıdy. Sonymen qatar Qazaqstan halqy Assambleıasynyń 30 jyldyqqa arnalǵan emblemasy jáne «Assambleıa jastary» logotıpi bar eki tý sonda ótetin kezdesý barysynda tabystalady. Týlar bir jyl boıy halyqaralyq ǵarysh stansasynda bolyp, jerge oralady, - dedi Tımýr Jumyrbaev.

Sondaı-aq ol bul ıdeıa Qyzylorda oblysy jastaryna tıesili ekenin atap ótti.