Qazaqstan halqy Assambleıasynyń músheleri mereıtoılyq medaldarmen marapattaldy
AQTÓBE. KAZINFORM — Qazaqstan halqy Assambleıasynyń 30 jyldyǵyna oraı oblys ákimdiginde oblystyq QHA-nyń eń belsendi jáne eńbegi sińgen múshelerin mereıtoılyq medaldarmen saltanatty marapattaý rásimi ótti.
Saltanatty rásimde oblys ákimi qatysýshylarǵa quttyqtaý sóz sóıledi. Ashat Shaharov ótken otyz jyl ishinde Assambleıa azamattyq qoǵamnyń mańyzdy ınstıtýtyna aınalyp, qoǵamdyq kelisimdi, turaqtylyq jáne ulttyq birlikti nyǵaıtýda sheshýshi ról atqarǵanyn atap ótti.
Marapattalǵandardyń qatarynda Qazaqstan halqy Assambleıasynyń Aqtóbe oblysy boıynsha tóraǵa orynbasary, oblystyq máslıhat depýtaty Sergeı Vıshnıak, QHA tóraǵasynyń oblystaǵy orynbasary, «Aqtóbe oblysy koreıler qaýymdastyǵy» qoǵamdyq birlestiginiń tóraǵasy ıÝrıı Shek, Aqtóbe oblysynyń koreıler qaýymdastyǵynyń ardageri Konstantın Tshaı, «Vaınah» sheshen etnomádenı birlestiginiń ardageri Hasan Saǵaev, QHA ardageri Erkin Qurmanbek jáne basqalar bar.
QHA músheleri eńbekterine berilgen joǵary baǵa úshin alǵystaryn bildirip, dostyq, tózimdilik pen birlikti damytýǵa ári qaraı da úles qosýǵa ázir ekendikterin jetkizdi.
— Memleket basshysy Qasym-Jomart Kemeluly Toqaev Qazaqstan halqy Assambleıasynyń qoǵamdaǵy ózara túsinistik pen kelisimdi nyǵaıtýǵa ólsheýsiz úles qosyp jatqanyn atap ótti. Oblysymyzdyń Qazaqstan halqy Assambleıasy 30 jyl ishinde óńirde birlikpen kelisimdi nyǵaıtý, etnos aralyq qatynastardy damytý salasynda birqatar jetistikter men nátıjelerge qoljetkizdi. Atap aıtsaq, bilim berý, mádenıet mekemelerinde, uıymdarda, aýdandarda jalpyulttyq birlik tinyǵaıtý, memlekettik tildi jáne ulttyq dástúrlerdi dáripteý, otbasylyq qundylyqtardy nasıhattaý boıynsha kezdesýler, sonymen qatar, etnomedıatsııa boıynsha semınarlar, qaıyrymdylyq aktsııalary, shyǵarmashylyq ujymdardyń kontsertteri jáne t. b. is-sharalar uıymdastyrylyp, myńdaǵan adam qamtyldy. Osy ózderińizben birlese ótkizilgen is-sharalardyń arqasynda óńirde tatýlyq pen dostyqty nyǵaıtyp kelemiz, — dep atap ótti ákim.
Sondaı-aq jıynda QHA Aqtóbe oblysy boıynsha tóraǵa orynbasary, oblystyq máslıhat depýtaty Sergeı Vıshnıak sóz alyp, Assambleıanyń atqarǵan jumystaryna toqtaldy. Al, oblystyq Qazaqstan halqy Assambleıasy janyndaǵy Aqsaqaldar Keńesiniń tóraǵasy Roman Rahıev ardagerlerdiń beıbitshilik pen kelisimniń 30 jylyna qosqan úlesin tilge tıek etti.
— Aqtóbe oblystyq Qazaqstan Halqy Assambleıasy el boıynsha úzdik bestikke enedi. Biz ári qaraı da bar kúshimizdi salyp, halyqtar arasyndaǵy dostyqty, beıbitshilik pen kelisimdi nyǵaıtý úshin jumys isteı beremiz, — dedi Sergeı Vıshnıak.
«Qazaqstan halqy Assambleıasyna 30 jyl» merekelik medali etnomádenı birlestik ókilderine, qoǵam qaıratkerlerine, ǵalymdarǵa, pedagogtarǵa, QHA ardagerlerine, sondaı-aq Assambleıa baǵdarlamalaryn júzege asyrýǵa belsendi qatysyp júrgen jas kóshbasshylarǵa tabystaldy.
Osyǵan deıin Aqtóbe oblysy Keńes Odaǵynyń Batyry Imanǵalı Biltabanovtyń 100 jyldyǵyn atap ótkenin jazdyq.