Qazaqstan halqy Assambleıasynyń 30 jyldyǵyna oraı jalpyulttyq ǵylymı-tájirıbelik konferentsııa ótti
ASTANA. KAZINFORM – Astana qalasynda «QHA-nyń 30 jyldyǵy: qazaqstandyq etnosaralyq toleranttylyq modeliniń tájirıbesi men damý bolashaǵy» atty jalpyulttyq ǵylymı-tájirıbelik konferentsııa ótti. Bul týraly QR Mádenıet jáne aqparat mınıstrliginiń baspasóz qyzmeti habarlady.
Konferentsııa jumysyna QR Mádenıet jáne aqparat vıtse-mınıstri Evgenıı Kochetov, Qazaqstan halqy Assambleıasynyń ókilderi, ortalyq memlekettik organdar qyzmetkerleri, sondaı-aq qazaqstandyq jáne halyqaralyq ǵylymı-sarapshylyq qaýymdastyqtyń ókilderi qatysty.
Jıyn barysynda Evgenıı Kochetov el birligi men etnosaralyq kelisimdi nyǵaıtý – eldiń turaqty damýynyń negizgi faktory ekenin atap ótti. Ol bul saladaǵy ǵylymı-zertteý jumystarynyń aıryqsha mańyzyna toqtaldy. Sebebi jan-jaqty taldaý, sarapshylardyń pikiri men praktıkalyq usynymdary ózekti syn-qaterlerdi der kezinde anyqtaýǵa, tıimdi tásilderdi qalyptastyrýǵa jáne qoǵamdaǵy ózara baılanystyń jańa úlgilerin engizýge múmkindik beredi.
Konferentsııa QHA-nyń 30 jyldyǵy aıasynda etnosaralyq qatynastardy damytýǵa qatysty keń aýqymdy máselelerdi talqylaýǵa arnaldy.
Іs-shara aıasynda Qoldanbaly etnosaıası zertteýler ınstıtýty men «Jastar» ǵylymı-zertteý ortalyǵy arasynda ǵylymı yntymaqtastyq týraly memorandýmǵa qol qoıyldy. Qujat birlesken zertteýlerdi damytýǵa, saraptamalyq materıalmen almasýǵa, sonda-aq jastar men etnosaıası taqyryptar boıynsha bastamalardy iske asyrýǵa baǵyttalǵan.
Buǵan deıin Memleket basshysy Qazaqstan halqy Assambleıasynyń 30 jyldyǵy — egemendik tarıhyndaǵy aıtýly oqıǵa ekenin aıtqan bolatyn.