Qazaqstan halqy assambleıasyna tıesili bolǵan qyzmettik mindetter Halyq keńesine ótedi — Toqaev
ASTANA. KAZINFORM — Memleket basshysy Qasym-Jomart Toqaev Parlament palatalarynyń birlesken otyrysynda jańa konstıtýtsııalyq organ — Qazaqstan Halyq Keńesiniń atqaratyn qyzmetteri jóninde málimdeme jasady.
— Shyn máninde, tıimdi jumys isteıtin qoǵamdyq ınstıtýttary bolsa ǵana, Ozyq jáne Ádiletti memleket qalyptasady. Sol sebepti, men jańa konstıtýtsııalyq organ — Qazaqstan Halyq Keńesin qurýdy usyndym. Qazaqstan Halyq Keńesi máslıhattardyń, qoǵamdyq keńesterdiń, sarapshylar alańy men azamattyq qoǵam uıymdary ókilderiniń basyn biriktiredi. Buryn Qazaqstan halqy assambleıasyna tıesili bolǵan qyzmettik mindetter endi Halyq keńesine ótedi. Osylaısha, qurylym formaty ózgergenimen, jalpyulttyq birligimizdiń máni ishki saıasatymyzdyń mańyzdy baǵyty retinde saqtalady. Halyq Keńesi — tarıhymyzda alǵash ret konstıtýtsııalyq deńgeıde qurylǵan dıalog alańy. Kópultty jáne áralýan Qazaqstanymyzdyń sımvoly, — dedi Prezıdent.
Onyń sózinshe, buryn shashyrańqy bolǵan qurylymdar zań shyǵarý bastamasyn kóterý quqyǵyna ıe bolatyn Joǵary konsýltatıvtik organnyń aıasyna birigedi. Demek, halyqtyń únine qulaq asý memlekettik saıasattyń ajyramas bóligine aınalady.
— Elimizde júrgizilgen reformalardyń eń basty nátıjesi — azamattardyń mańyzdy memlekettik sheshimderdi qabyldaý úderisine qatysa alýy. Halyqtyń óz yqtııaryn tikeleı bildirý tetigi otyz jylǵa jýyq ýaqyt boıy qoldanylmaı keldi. Tek sońǵy jyldary ǵana saıası tájirıbemizge endi. 2022 jyldan beri el taǵdyryna áser etetin mańyzdy máseleler boıynsha úsh ret jalpyulttyq referendým ótti. Bul oraıda meniń ustanymym burynǵydaı: eldegi ózgeristerdiń ıesi halyq bolýǵa tıis. Alaıda bılik naqty bastamalar kótere alady ári solaı bolýy kerek. Qazirdiń ózinde elimizde júzege asyrylǵan reformalar bılik ınstıtýttarynyń ornyqty tejemelik jáne teńgerim júıesin qalyptastardy, memlekettik basqarý sapasyn arttyrdy dep senimmen aıta alamyz. Alaıda reformalardyń basty maqsaty — halyqtyń ál-aýqatyn arttyrý, óńir turǵyndarynyń turmys sapasyn jaqsartý. Bul úshin Úkimet, zań shyǵarýshy organ, tutas qoǵam jumyla eńbek etýi qajet, — dedi Memleket basshysy.
Aıta keteıik, buǵan deıin erteń Qazaqstanda memlekettik basqarý júıesin túbegeıli jańǵyrtý bastalatyny jónindegi Toqaevtyń málimdemesin jarııalaǵanbyz.
