Qazaqstan halqy Assambleıasyna 30 jyl: Búkil oblysta estelik taqtalar ashyldy
ASTANA. KAZINFORM – Astanadaǵy Beıbitshilik jáne kelisim saraıyna Alǵys aıtý kúnine arnalǵan forým ótip, Qazaqstan halqy Assambleıasynyń 30 jyldyǵy resmı ashyldy.
Saltanatty is-shara aıasynda oblys ortalyqtary men respýblıkalyq mańyzdaǵy qalalarda ornalasqan Dostyq úılerinde, bir mezette QHA 30 jyldyǵyna arnalǵan estelik taqtalar ashyldy.
- Barlyq óńirlerde QHA 30 jyldyǵyna arnalǵan estelik taqtanyń ashylý rásimi bolady. Biz ol estelik taqtanyń biryńǵaı syzbasyn jasap, búkil óńirlerge joldaǵanbyz. Búgin osy taqtalar búkil oblys ortalyqtaryndaǵy, Astana qalasyndaǵy Dostyq úılerinde, ashylady. Biz de óz estelik taqtamyzdy ashamyz, ony respýblıkalyq dostyq úıine beretin shyǵarmyz. Bul estelik taqtanyń kólemi ár jerde ár túrli bolýy múmkin. Meniń bilýimshe biz jańa ǵana ashqan taqta Astanadaǵy Dostyq úıine ilinetin orynnyń kólemine qaraı jasalǵan. Búgin óńirlerde QHA 30 jyldyǵyna arnalǵan chelendjder men forýmdar ótip, túrli jobalardyń tusaýy kesiledi, - deıdi QHA tóraǵasynyń orynbasary Marat Ázilhanov.
Forýmnan shyqqan qaýym «Qazaq eline alǵys» monýmentine baryp qazaq halqyna alǵys retinde sımvolıkalyq gúl shoǵyn qoıdy.
- Bul jolǵy is-sharaǵa óńirlerden eshkimdi shaqyrǵan joqpyz. Tipti Astana qalasyndaǵy Assambleıa músheleriniń bir toby ǵana osynda júr. Qalǵandary ózge óńirlerdegi áriptesterimen birge Dostyq úılerinde saltanatty sharalar ótkizip jatyr. Degenmen bárimiz onlaın rejımde baılanystamyz deýge bolady. Telearnalarda qazir telemarafon ótip jatyr. Osydan týra 30 jyl buryn Qazaqstan halqy Assambleıasy quryldy. Bul táýelsizdiktiń alǵashqy jyldarynda eldegi turaqtylyqty pen tatýlyqty saqtaý úshin qabyldanǵan mańyzdy sheshim boldy. Assambleıa – qoǵamda etnostar arasyndaǵy syılastyq pen túsinistikti qamtamasyz etetin, el birligin nyǵaıtatyn biregeı ınstıtýt, - dedi QHA tóraǵasynyń orynbasary.
Aıta ketý kerek, Qazaqstan halqy Assambleıasynyń qurylǵanyna 30 jyl tolyp otyr.