Qazaqstan halqy 20,3 mln adamǵa jetti – Statıstıka bıýrosy

ASTANA. KAZINFORM – 2025 jylǵy 1 mamyrdaǵy jaǵdaı boıynsha Qazaqstan halqynyń sany 20 353 265 adamǵa jetti. Bul týraly Ulttyq statıstıka bıýrosy málim etti.

Jyl basynan beri el halqy 69,8 myń adamǵa artty. Onyń ishinde tabıǵı ósim 63,4 myń adamdy, al kóshi-qon esebinen ósim 6,3 myń adamdy qurady.

Halyq sanynyń eń joǵary ósimi elordada tirkeldi. Astana turǵyndarynyń qatary osy kezeńde 29,7 myń adamǵa kóbeıdi. Bul ósimniń 78,3 paıyzy kóshi-qon esebinen qamtamasyz etilgen.

Statıstıkalyq málimetterge sáıkes, kóshi-qonnyń oń saldosy 5 óńirde – Almaty jáne Mańǵystaý oblystarynda, sondaı-aq respýblıkalyq mańyzy bar úsh qalada – Astana, Almaty jáne Shymkentte baıqaldy. 

Sonymen qatar bıýronyń 12 mamyrdaǵy jarııalanǵan málimetinshe, qantar-naýryzda elge kelgender sany 4923 adamdy, elden ketkender sany 1122 adamdy qurady. Kóshi-qon aıyrymy 3801 adamdy qurady. 

Qujatta kórsetilgendeı eldiń negizgi kóshi-qon almasýy TMD memleketterimen júretini kórsetilgen. Osy elderden kelgenderdiń úlesi 84,1 paıyz, al bul elderge ketkenderdiń úlesi 68 paıyzdy qurady.

Aıta keteıik, buǵan deıin Qazaqstandaǵy eńbek kóshi-qonyna qatysty statıstıkalyq derekterge sholý jasaǵanbyz.