Qazaqstan halyqaralyq volonterliktiń tartylys kúshine aınaldy
ASTANA. KAZINFORM – Qazaqstan Ortalyq Azııada volonterlikti damytý jáne qoldaý boıynsha kóshbasshy el retinde tanyldy. Bul týraly Mádenıet jáne aqparat mınıstrliginen málim etti.
- Elimizde volonterlik baǵytta ótkizilgen is-sharalardyń tıimdiligi turaqty túrde áleýmettanýlyq saýalnamalar, zerdeleý jumystary men óńirlerdegi volonterlik salanyń damýy boıynsha monıtorıng júrgiziledi. Máselen, buryn qabyldanǵan volonterlik sharalardyń tıimdiligin keshendi baǵalaý salalyq damý modeline kóshý qajettigin kórsetti. Osy taldaý nátıjesinde Biryńǵaı operator (AQQO) arqyly granttyq qarjylandyrýdyń tetikteri men mazmuny túbegeıli jańartyldy. Nátıjesinde 6 eń ózekti baǵyt (Tótenshe jaǵdaılardyń aldyn alý jáne olardyń saldaryn joıý, «Taza Qazaqstan» aktsııasy aıasyndaǵy ekologııalyq volonterlik, Medıtsınalyq volonterlik, Tarıhı-mádenı murany saqtaý, Zoovolonterlik, Áleýmettik volonterlik) aıqyndaldy. Monıtorıng óńirlerde volonterlikti damytýdyń mańyzdylyǵyn rastady. Joba 17 oblys pen 3 megapolısti qamtyp, óńirlerdegi ınfraqurylymdy nyǵaıtýǵa yqpal etkeni anyqtaldy,- dedi mınıstrlikten agenttiktiń resmı saýalyna oraı.
Vedomstvonyń atap ótýinshe, júrgizilgen baǵalaý nátıjeleri men tabysty keıster (shaǵyn granttar sııaqty) 2030 jylǵa deıingi volonterlikti damytý tujyrymdamasynyń negizin quraıdy.
Jańa tujyrymdama volonterlikti makrokórsetkishterden naqty áleýmettik nátıjelerge kóshirýge múmkindik beredi.
- Jalpy, Qazaqstan halyqaralyq volonterliktiń tartylys kúshine aınalǵandyǵyn 2022, 2023 jyldary ótkizilgen Ortalyq Azııa jáne Halyqaralyq volonterler forýmdary arqyly baıqaýǵa bolady. Olarǵa 34 shet elden 1 myńnan astam volonter qatyssa, 2024 jyly Astanada Azııadaǵy ózara is-qımyl jáne senim sharalary jónindegi keńestiń volonterler sleti 24 memlekettiń delegattarynyń qatysýymen ótti. Atqarylǵan aýqymdy is-sharalardyń nátıjesinde 2024 jyly BUU Eriktiler baǵdarlamasymen alǵash ret Ortalyq Azııadaǵy volonterlik jaǵdaı týraly óńirlik sholý jarııalandy. Onyń BUU shtab-páterinde ótken tusaýkeser tanystyrylymynda Qazaqstan Ortalyq Azııada volonterlikti damytý jáne qoldaý boıynsha kóshbasshy el retinde tanyldy,- dedi Mádenıet mınıstrligi.
Aıta keteıik, osy jyldyń sońyna deıin elimizdegi volonterliktiń damý baǵytyn aıqyndaıtyn tujyrymdama ázirlenedi.
