Qazaqstan halyqaralyq uıymdardy Gaza sektoryndaǵy jaǵdaıǵa aralasýǵa shaqyrady — QR SІM basshysy
Syrtqy ister vıtse-premer – mınıstri Murat Nurtileý senbi kúni Saýd Arabııasynyń astanasynda ótken Arab Memleketteri Lıgasynyń (LAG) jáne Islam Yntymaqtastyǵy Uıymynyń (IYU) kezekten tys birlesken sammıtine qatysty. Bul týraly Kazinform Qazaqstannyń Syrtqy ister mınıstrligine silteme jasap habarlaıdy.
Sammıtte sóılegen sózinde Syrtqy ister vıtse-premer – mınıstri Qazaqstan BUU Bas Assambleıasynyń 27 qazandaǵy tótenshe arnaıy sessııasynda Iordanııa Hashımıt Koroldigi usynǵan atysty toqtatýǵa shaqyratyn qararǵa daýys bergeni týraly aıtty.
Ol óz kezeginde beıbit turǵyndar, onyń ishinde kóp balalar, áıelder men qart adamdar soǵystyń jazyqsyz qurbany bolǵanyn atap ótti. Syrtqy ister vıtse-premer – mınıstri Gaza sektoryndaǵy áıelderdiń, balalardyń jáne qarttardyń qaýipsizdigi basty basymdyq bolyp qala beretinin jetkizdi. Sondaı-aq Murat Nurtileý ızraıldik áriptesi, Izraıldiń Syrtqy ister mınıstri Elı Koenmen jaqynda telefon arqyly sóıleskenin tilge tıek etip, kelissózder barysynda atysty dereý toqtatýǵa shaqyrǵanyn jáne beıbit sheshim izdeý qajettigin sóz etti.
Onyń aıtýynsha, Qazaqstan Egıpettiń azamattyq halyqqa medıtsınalyq jáne gýmanıtarlyq kómek kórsetý úshin dálizder berý týraly sheshimin maquldaıdy. Qazaqstan Palestınanyń baýyrlas halqy úshin bir mıllıon dollar syıǵa tartty jáne qosymsha gýmanıtarlyq kómek jetkizýdi josparlap otyr. QR SІM basshysy Qazaqstannyń 150-den astam azamaty, onyń ishinde qazirgi ýaqytta Gaza sektorynda júrgen áıelder men balalar Rafak baqylaý-ótkizý pýnkti arqyly shyǵa almaıtynyna alańdaýshylyq bildirdi.
«Men bul múmkindikti paıdalana otyryp Egıpetti jáne barlyq qatysýshy tarapty, Qazaqstan azamattaryn, olardyń otbasy múshelerin jáne basqa da sheteldikterdi Gaza sektorynan sózsiz evakýatsııalaýǵa shaqyramyn. Biz bul azamattarǵa Rafakty kesip ótýge ruqsat etilgennen keıin birden Qazaqstanǵa evakýatsııalanýy úshin sharalar qabyldadyq», — dep atap ótti M.Nurtileý.
«Qazaqstan barlyq halyqaralyq jáne gýmanıtarlyq uıymǵa Gaza sektoryndaǵy qazirgi asa kúrdeli jaǵdaıǵa aralasýǵa shaqyrady. Osy maqsatta biz Gaza sektorynyń turǵyndary úshin Tótenshe gýmanıtarlyq azyq-túlik baǵdarlamasyn iske asyrý úshin Azyq-túlik qaýipsizdigi Islam Uıymynyń qoldanystaǵy tetigin paıdalanýdy usynamyz», — dedi sammıtte sóılegen sózinde Syrtqy ister vıtse-premer – mınıstri.
Ol sonymen qatar IYU-ǵa qatysýshy elder bul ınstıtýtty damyp kele jatqan gýmanıtarlyq apatty jeńildetý jáne zardap shekken aýdandardaǵy jaǵdaıdy jeńildetý úshin paıdalana alatynyn aıtty.
Qazaqstannyń Syrtqy ister vıtse-premer – mınıstri IYU sııaqty álemdik kóshbasshylar men yqpaldy halyqaralyq uıymdardyń óz kúsh-jigerin jandandyryp, Taıaý Shyǵysta ǵana emes, búkil álemde turaqtylyq pen qaýipsizdik úshin daýly taraptardy kelissózder ústeline otyrǵyzatyn ýaqyty kelgenin atap ótti.
«Úmmanyń máni-birlik, ortaq qundylyqtar qaýymdastyǵy. Osy qıyn ýaqytta bizdiń IYU-ǵa qatysýshy elder retindegi mindetimiz — jazyqsyz adamdardyń ómirin qorǵaý jáne zorlyq-zombylyqty toqtatý maqsatynda birigý», — dedi ol.
Murat Nurtileý sóz sońynda, Qazaqstan Taıaý Shyǵysta berik beıbitshilik ornatý úshin kez kelgen kúsh-jigerdi qoldaýǵa daıyn ekenin jetkizdi.
