Qazaqstan halyqaralyq tórelikten $5 mlrd aıyppulǵa qatysty habarlandyrý aldy

ASTANA. KAZINFORM – Qashaǵan ken ornyn ıgerýshi NCOC kompanııasy ekologııalyq aıyppulǵa baılanysty túsirgen talap aryzǵa saı, Qazaqstan halyqaralyq tórelikke qatysady. Bul jóninde QR Ádilet mınıstrligi málimdedi. 

– Qashaǵan ken ornyndaǵy merdiger kompanııalar 2026 jyldyń 9 aqpanynda halyqaralyq tórelikke ótinim bergen. Soǵan baılanysty Qazaqstanǵa Investıtsııalyq daýlardy retteýdiń halyqaralyq ortalyǵynan habarlama keldi, - degen aqparat taratty mınıstrliktiń baspasóz qyzmeti.

Vedomstvo málimetinshe, daýǵa sebep bolǵan másele boıynsha jaýapty ári quziretti memlekettik organ sot otyrystarynda QR Úkimetiniń múddesin qorǵaıdy. Al Ádilet mınıstrligi oǵan quqyqtyq jáne konsýltatsııalyq kómek kórsetedi. 

Aıta keteıik, Qazaqstan úkimeti munaı alpaýyttarymen birneshe jyldan beri sottasyp jatyr. 

Eske salsaq, 2023 jyly North Caspian Operating Company kompanııasyna júrgizilgen tekserý qorytyndysynda kúkirttiń normadan tys saqtalǵany anyqtaldy. Ruqsat etilgen 730 myń tonna kúkirttiń ornyna 1 mln 750 myń tonna kúkirt saqtalǵan. Sol sebepti, Qazaqstan Qashaǵan operatoryn ekologııalyq normalardy óreskel buzǵany úshin 2,3 trln teńge nemese 5,1 mlrd dollarǵa sotqa bergen edi.