Qazaqstan halyqaralyq tórelik sotynda óz ustanymyn qorǵap shyqty
ASTANA. KAZINFORM – Qazaqstan Respýblıkasy halyqaralyq tórelikte kezekti ret jeńiske jetti, dep habarlaıdy Ádilet mınıstrliginiń baspasóz qyzmeti.
Mınıstrliktiń málimetinshe, Gaaga qalasyndaǵy Turaqty tórelik palatasy (TTP) ákimshiligindegi Evgenıı Belavınniń Qazaqstanǵa qarsy bastaǵan UNCITRAL (Birikken Ulttar Uıymynyń Halyqaralyq saýda quqyǵy jónindegi komıssııasy) tórelik isi toqtatyldy.
Atalǵan tórelik is 1997 jylǵy Qazaqstan men Qyrǵyz Respýblıkasy arasyndaǵy ekijaqty ınvestıtsııalyq kelisimge negizdelgen. Іs barysynda E.Belavın Qazaqstannan 34 mıllıard AQSh dollarynan astam ótemaqy óndirýdi talap etken bolatyn.
2025 jylǵy 1 qyrkúıekte Tórelik trıbýnal isti dereý toqtatý týraly qaýly qabyldap, talapkerdi trıbýnal men TTP-nyń barlyq shyǵyndaryn tóleýge, sondaı-aq Qazaqstan Respýblıkasynyń tórelik barysynda jumsaǵan shyǵyndaryn óteýge mindettedi.
Sonymen qatar, trıbýnal Qazaqstan Respýblıkasynyń ustanymyn tolyq qoldap, memleketke qarsy qoıylǵan barlyq aıyptaýlardy zańsyz dep tanydy.
Aıta keteıik, Ádilet mınıstrliginiń dereginshe, halyqaralyq sotta Qazaqstanǵa qatysty 20 is qaralyp jatyr.