Qazaqstan halyqaralyq kitap baıqaýynda toǵyz júldeli orynǵa ıe boldy
ASTANA. KAZINFORM – Qazaqstandyq baspalar usynǵan kitaptar Mınsk qalasynda ótken XXIII «Iskýsstvo knıgı – 2026» halyqaralyq baıqaýynda toǵyz júldeli orynǵa ıe boldy, dep habarlaıdy Mádenıet jáne aqparat mınıstrligi.
Baıqaý qorytyndysy boıynsha otandyq avtorlardyń kitaptary eki birinshi, tórt ekinshi jáne úsh úshinshi oryndy ıelendi.
«Moıa strana» nomınatsııasynda Qymbat Qaraevanyń «Kóshpendiler oıyndary» kitaby birinshi oryn aldy. Sondaı-aq «Naýka ı obrazovanıe» nomınatsııasynda Kenjehan Matyjanovtyń «Abaı» úsh tomdyǵy úzdik dep tanyldy.
– Qazaqstandyq baspalar usynǵan kitaptar halyqaralyq baıqaýda toǵyz júldeli orynǵa ıe boldy. Onyń ishinde eki kitap birinshi, tórt basylym ekinshi, taǵy úsh kitap úshinshi oryn aldy, – delingen aqparatta.
Ekinshi oryn Erlan Qojabaevtyń «Qazaq oıýlary», Nellı Býbeniń «Amandos Aqanaevtyń ǵalamy. Sýretshiler áýleti», Kádirbek Segizbaıulynyń «Qazaqy dastarhan» jáne Aıdarhan Jadykovtyń «Geroı-Kazahstantsy. Kratkıı bıblıografıcheskıı spravochnık» kitaptaryna buıyrdy.
Úshinshi oryndy Marat Ázilhanovtyń «Veterany Assambleı naroda Kazahstana», Seıit Kenjeahmetulynyń «Qazaqtyń salt-dástúrleri men ádet-ǵuryptary» jáne Baıanǵalı Álimjanovtyń «Abylaı han men batyrlar» kitaptary ıelendi.
Sonymen qatar Gúlmıra Amandyqovanyń «Abaı Qunanbaıulynyń qara sózderi. Urpaqqa ulaǵat» kitaby nomınant dıplomymen marapattaldy.
Á.Dúzelhanovtyń «Momýnbaı ı semero razboınıkov. Po motıvam kazahskoı narodnoı skazkı», Maksım Zverevtiń «Zolotoı saıgak» jáne Júsipbek Qorǵasbektiń «Kelndaǵy kókjal» kitaptaryna arnaıy dıplomdar tabystaldy.
Jalpy Qazaqstan baıqaýdyń negizgi nomınatsııalaryna 10 kitap, arnaıy dıplomdarǵa úsh basylym usynǵan.
Aıta keteıik, Qazaqstan Gýanchjoýdaǵy halyqaralyq kitap kórmesinde ulttyq pavılonyn tanystyrdy.
