Qazaqstan halyqaralyq kólik habyna aınalý mindetin qoıyp otyr – saıasattanýshy
Beıjińde «Bir beldeý, bir jol» halyqaralyq yntymaqtastyǵynyń III forýmy ótti. Oǵan qatysqan Prezıdent Qasym-Jomart Toqaev birqatar mańyzdy másele kóterdi. Osy oraıda qazaqstandyq saıasattanýshy, «Qytaı zertteýshiler qaýymdastyǵy» qoǵamdyq qorynyń tóraǵasy Qazbek Maıgeldınov «Bir beldeý, bir jol» bastamasynyń Qazaqstan úshin qandaı ıgiligi bar ekenine qatysty pikir bildirdi, dep habarlaıdy Kazinform.
Saıasattanýshy Qazbek Maıgeldınovtiń aıtýynsha, Qytaı men «Bir beldeý, bir jol» jobasyna qatysýshy elderdi ekonomıkalyq yntymaqtastyq, ınvestıtsııa tartý, ınfraqurylym, kólik baılanystaryn damytý, jańa jumys oryndaryn qurý jáne halyqtyń ómir súrý deńgeıin arttyrý sııaqty ortaq maqsattar biriktirip otyr.
«Qazaqstan tranzıttik qana emes, sonymen qatar halyqaralyq mańyzy bar kólik habyna aınalý mindetin qoıyp otyr. Memleket basshysy Qasym-Jomart Toqaev Qytaıdan Eýropaǵa eksporttalatyn júkterdiń 85%-y Qazaqstan arqyly ótetinin atap ótti. Bizdiń elimiz áýelden «Bir beldeý, bir jol» megajobasyna beker tańdalmaǵan. Óıtkeni, Qazaqstannyń geografııalyq ornalasýy Qytaı men Eýropa arasynda kópir bolýǵa múmkindik beredi. Búginde Qytaımen birlesip, Lıanıýngandaǵy logıstıkalyq ortalyq, «Qorǵas» qurǵaq porty, batys Eýropa-Batys Qytaı tranzıttik magıstrali, Qytaıdan Iranǵa temirjol dálizi sııaqty iri jobalar iske asty. Bul «Bir beldeý, bir jol» jobasyna qatysqanymyzdyń nátıjesi», - dedi Qazbek Maıgeldınov.
Saıasattanýshy Qytaı men Qazaqstan óndiristik qýattardy damytý boıynsha da birlesken jobalardy iske asyryp jatqanyn atap ótti.
«Búginde eki el quny 21 mlrd dollardan asatyn 52 jobany júzege asyryp jatyr. Qytaı bizdiń ekonomıkamyzdaǵy úzdik 5 ınvestordyń qatarynda. Ótken jyly eki el arasyndaǵy saýda 31 mlrd dollarǵa jetti, maqsat – 40 mlrd dollarǵa shyǵarý», - dep toqtaldy sarapshy.
Prezıdenttiń Qytaıǵa resmı sapary barysynda quny 16,5 mlrd dollar bolatyn 30 kommertsııalyq qujatqa qol qoıyldy. Qazbek Maıgeldınovtiń paıymyna saı, atalǵan kelisimder Qazaqstan ekonomıkasyn damytýda mańyzdy ról atqarady.
«Marketpleıster – Qazaqstan úshin óte mańyzdy. Qazaqstandyqtar Aliexpress, Pinduoduo, Taobao sııaqty álemdik aýqymdaǵy Qytaı marketpleısteriniń qyzmetin paıdalanady. «Qazposhta» men YTO Express Group arasyndaǵy kelisim onlaın-saýda, jetkizý jáne arnaıy termınaldardy qurýda perspektıvalar ashady. Qazaqstan bul turǵyda aldyńǵy qatarda bolýy tıis», - dep pikir bildirdi saıasattanýshy.
Qazbek Maıgeldınovtiń sózinshe, Qytaımen yntymaqtastyq Qazaqstan úshin úlken múmkindikke jol ashady.
«Qazaqstan men Qytaıdyń yntymaqtastyǵy óńirdiń ekonomıkalyq ıntegratsııasyn nyǵaıtýǵa múmkindik beredi. Biraq kez kelgen yntymaqtastyq ózara tıimdi jáne eki jaqtyń múddelerin qurmetteýge negizdelýi kerek», - dep túıindedi Qazbek Maıgeldınov.
