Qazaqstan halyqaralyq kapıtal úshin jańa baǵyttardy ashpaq
ASTANA. KAZINFORM — Sońǵy jyldardaǵy ekonomıkalyq transformatsııa eldiń dástúrli shıkizat sektorynan tys ınvestıtsııalyq múmkindikterin birtindep keńeıtip otyr. Óńdeý ónerkásibin, kólik ınfraqurylymyn, aýyl sharýashylyǵyn jáne tsıfrlyq qyzmetterdi damytý halyqaralyq kapıtal úshin jańa baǵyttardy ashty. Bul týraly The World Financial Review brıtandyq iskerlik basylymynyń maqalasynda aıtylǵan.
Qosymsha faktor retinde ekonomıkanyń syrtqy mindettemeler qurylymyndaǵy ózgeristerdi atap ótýge bolady. Bes jyl ishinde syrtqy boryshtyń JІÓ-ge qatynasy 83,1%-dan 59,4%-ǵa deıin tómendedi, bul salystyrmaly boryshtyq júktemeniń azaıǵanyn kórsetedi.
Árıne, ártaraptandyrylǵan ekonomıkalyq modelge kóshý uzaqmerzimdi mindet bolyp qala beredi. Ol Qazaqstannyń halyqaralyq yntymaqtastyǵynda da kórinis tabady. Dúnıejúzilik banktiń 2026–2031 jyldarǵa arnalǵan jańa eldik baǵdarlamasy ınfraqurylymdy damytýǵa, ekonomıkanyń ornyqtylyǵyn arttyrýǵa jáne ónimdiligi joǵary ári ınnovatsııalyq jeke sektordy qalyptastyrý úshin qolaıly jaǵdaı jasaýǵa baǵyttalǵan. Negizgi basymdyqtardyń biri jeke kapıtaldyń qatysýyn keńeıtý jáne ekonomıkalyq ósýdiń óndirýshi salalarǵa táýeldiligin tómendetý bolyp sanalady.
Qazaqstannyń ekonomıkalyq baǵyty osy mindetterdi sheshýge baǵyttalǵan. Bul saıasatty odan ári júzege asyrý eldiń jańa salalardy damytý, básekege qabilettilikti arttyrý jáne halyqaralyq ekonomıkalyq yntymaqtastyqty keńeıtý úshin jınaqtalǵan resýrstyq ári ınvestıtsııalyq áleýetti qanshalyqty tıimdi paıdalana alatynyna baılanysty bolady.
