Qazaqstan halyqaralyq gýmanıtarlyq quqyqty saqtaý boıynsha úndeý jasady
ASTANA. KAZINFORM — Qazaqstan, Brazılııa, Iordanııa, Qytaı, Frantsııa jáne Ońtústik Afrıka Respýblıkasynyń basshylary Halyqaralyq Qyzyl Krest Komıtetimen (HQKK) birlesip, soǵys kezinde izgilikti saqtaýǵa shaqyratyn málimdeme jasady, dep habarlaıdy QR SІM baspasóz qyzmeti.
Vedomstvo málimetinshe, óz málimdemesinde memleket basshylary búkil álemdegi qaqtyǵystarda halyqaralyq gýmanıtarlyq quqyqtyń (HGQ) keń aýqymda buzylýyna jáne onyń saldarynan bolyp jatqan adamzattyq qasiretke alańdaýshylyq bildirdi.
— Olar barlyq memleketter men qarýly qaqtyǵystardyń taraptaryn HGQ-ny, atap aıtqanda, beıbit turǵyndardy, azamattyq nysandardy, sondaı-aq medıtsına jáne gýmanıtarlyq sala qyzmetkerlerin qorǵaýǵa qatysty normalardy saqtaýǵa shaqyrdy. Sondaı-aq memleket basshylary 2026 jyly soǵys kezinde izgilikti saqtaýǵa arnalǵan joǵary deńgeıdegi jahandyq kezdesý uıymdastyrylatynyn jarııalady, — delingen mınıstrlik habarlamasynda.
Syrtqy ister mınıstrligi atap ótkendeı, bul málimdeme halyqaralyq gýmanıtarlyq quqyqqa saıası beıildilikti kúsheıtý jónindegi Jahandyq bastamany ilgeriletý aıasynda jasaldy.
— Bastama HGQ-nyń neǵurlym qatań saqtalýyn qamtamasyz etý boıynsha praktıkalyq usynymdar ázirleýge baǵyttalǵan jáne 2024 jylǵy 27 qyrkúıekte Nıý-Iorkte BUU Bas Assambleıasynyń 79-shy sessııasy aıasynda bastamashy alty eldiń SІM basshylyǵy men HQKK kezdesýi barysynda jarııalandy. Qazirgi ýaqytta bastamaǵa 89 memleket resmı túrde qosyldy, al 130-dan astamy jeti taqyryptyq baǵyt boıynsha jahandyq jáne óńirlik konsýltatsııalarǵa qatysty, — dep túıindedi QR SІM.
Birlesken málimdeme álem jurtshylyǵyn keńinen habardar etý maqsatynda BUU-nyń alty resmı tilinde, sondaı-aq qazaq jáne portýgal tilderinde jarııalandy.
Buǵan deıin habarlanǵandaı, Qazaqstan ETS kompanııasynyń bilimdi testileý tájirıbesin zerdeleýge múddeli.