Májilis halyqaralyq deńgeıdegi banktermen kelisimge qatysty eki zańdy qabyldady
ASTANA. KAZINFORM – Májilistiń jalpy otyrysynda Qazaqstan Respýblıkasy men Halyqaralyq Qaıta Qurý jáne Damý Banki, sondaı-aq, Azııa Infraqurylymdyq Investıtsııalar Banki arasyndaǵy qaryz týraly kelisimderdi ratıfıkatsııalaý týraly eki zań qabyldandy.
– Qazaqstan Respýblıkasy Prezıdentiniń aǵymdaǵy jylǵy 15 mamyrdaǵy jáne 15 maýsymdaǵy jarlyqtaryna sáıkes jalpy somasy 154,7 mlrd japon ıenin quraıtyn Qaryz týraly kelisimderge, 2026 jylǵy 20 mamyrda jáne 15 maýsymda qol qoıyldy. Japon ıeni valıýtasyn tańdaýdaǵy negizgi sebep, ol Japonııadaǵy tómen bazalyq paıyzdyq mólsherlemege jáne teńge men japon ıeni arasyndaǵy tyǵyz baılanysqa negizdeledi. Bul qarajat, ekonomıkanyń mańyzdy salalaryn qarjylandyrýdy qosa alǵanda, Úkimettiń birinshi kezektegi sharalaryn qoldaýǵa múmkindik beredi. Atalǵan bankterdiń qaryzdary, 5 jyldyq jeńildik kezeńin qosa alǵanda, 11 jyl óteý merzimimen beriledi. Tartylatyn qaryzdar boıynsha mindettemeler, usynylyp otyrǵan Kelisimderde bekitilgen qarjylyq sharttarǵa sáıkes, respýblıkalyq bıýdjet qarajaty esebinen óteletin bolady. Sonymen birge, bul bankter bizdiń strategııalyq áriptesterimiz bolyp tabylatynyn jáne Qazaqstan ekonomıkasyna zor úles qosyp jatqanyn atap ótý kerek, – dedi Qarjy mınıstri Mádı Takıev.
Onyń sózinshe, Qazaqstan, Halyqaralyq Qaıta Qurý jáne Damý Bankine 1992 jyly qosylyp, memlekettiń úlesi 0,17%-dy qurasa, Azııa Infraqurylymdyq Investıtsııalar bankine 2017 jyly qosyldy, onda úles – 0,754%.
Ótken jyldardyń ishinde, Qazaqstan men atalǵan bankter arasynda keń aýqymdy ekonomıkalyq máselelerdi qamtıtyn, berik jáne syndarly baılanys, yntymaqtastyq qalyptasty.
Aıta keteıik, buǵan deıin Ózbekstannyń memlekettik qaryzy 47 mlrd dollarǵa jýyqtaǵanyn jazǵanbyz.
