Qazaqstan Halyqaralyq damý qaýymdastyǵymen jumys isteıtindeı kedeı el emes - Jumanǵarın

ASTANA. KAZINFORM — Qazaqstanǵa Halyqaralyq damý qaýymdastyǵymen jumys isteýdiń qajeti joq. Bul týraly Májilistiń jalpy otyrysynda Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.

Aıta keteıik, palata otyrysynda «Bir taraptan Qazaqstan Respýblıkasynyń Úkimeti jáne ekinshi taraptan Halyqaralyq qaıta qurý jáne damý banki, Halyqaralyq qarjy korporatsııasy men ınvestıtsııalar kepildiginiń Kópjaqty agenttigi arasyndaǵy Qazaqstan Respýblıkasynyń ornyqty damýyna jáne órkendeýine járdemdesý maqsatynda yntymaqtastyqty keńeıtý jónindegi áriptestik týraly negizdemelik kelisimdi ratıfıkatsııalaý týraly» Zań qabyldanǵan edi.

Osy oraıda depýtat Ábýtálip Mútáli Dúnıejúzilik bank tobyna 5 qarjy ınstıtýty kiretinine, al búgin qaralyp otyrǵan kelisim aıasynda olardyń úsheýimen ǵana kelisim jasalatynyna nazar aýdardy.

- Halyqaralyq damý qaýymdastyǵy men Investıtsııalyq daýlardy retteý jónindegi halyqaralyq ortalyq kelisimnen tys qalyp otyr. Bul rette kelisimniń 3-bap 4-tarmaǵy Dúnıejúzilik bank tobynyń kez kelgen sýbektisiniń konsýltatsııalyq qyzmetterdi júzege asyrýyn kózdeıdi, - dedi depýtat.

Sondyqtan ol vıtse-premerden negizdemelik kelisim Dúnıejúzilik bank tobynyń barlyq ınstıtýtymen nege jasalmaıtynyn surady.

- Birinshiden, Halyqaralyq damý qaýymdastyǵy tek kedeı eldermen jumys isteıdi. Qazaqstan ondaı elderge jatpaıdy. Qazirgi ýaqytta deńgeıi ortashadan joǵary elderdiń qataryndamyz. Sol sebepti onymen jumys isteýdiń qajeti joq, - dedi vıtse-premer.

Onyń málimetinshe, Investıtsııalyq daýlardy retteý jónindegi halyqaralyq ortalyq qazirgi ýaqytta Qazaqstanda ınvestıtsııalyq qyzmet júrgizbeıdi.

- Sol sebepti negizdemelik kelisimge qosýdyń qajeti joq, - dedi Serik Jumanǵarın.

TMD keńistiginde alıment boıynsha sot buıryqtaryn taný tetigi engiziletini týraly jazdyq.