Qazaqstan halyqaralyq bilim berý salasynda Taılandpen seriktestikti nyǵaıtady
ASTANA. KAZINFORM — QR Ǵylym jáne joǵary bilim mınıstri Saıasat Nurbek pen Qazaqstandaǵy Taıland Koroldiginiń Tótenshe jáne Ókiletti Elshisi Pııapın Nııomrerks ekijaqty yntymaqtastyqty keńeıtý perspektıvalaryn talqylady. Taraptar joǵary bilim, akademııalyq mobıldik jáne sheteldik stýdentterdi tartý salasy týraly sóz qozǵady.
Mınıstr Memleket basshysynyń tapsyrmasyn oryndaý aıasynda Qazaqstannyń Ulybrıtanııa, AQSh, Qytaı, Ońtústik Koreıa jáne Eýropa elderiniń jetekshi ýnıversıtetterin biriktiretin halyqaralyq bilim ortalyǵyn júıeli túrde qalyptastyryp jatqanyn atap ótti. Qazirgi tańda elimizde halyqaralyq standarttar boıynsha bilim baǵdarlamalaryn júzege asyratyn sheteldik joǵary oqý oryndarynyń fılıaldary tabysty jumys istep otyr, sondaı-aq zamanaýı akademııalyq jáne zertteý ınfraqurylymy qurylady.
Kezdesý barysynda Qazaqstanda bilim alýǵa Taılandtan stýdentterdi tartý múmkindikterine erekshe nazar aýdaryldy. Qazaqstan ýnıversıtetteri sapaly bilim, qoljetimdi jáne yńǵaıly oqý jáne turý jaǵdaılaryn, sondaı-aq aǵylshyn tilindegi keń aýqymdy baǵdarlamalardy usyna alatyny atap ótildi. Sonymen qatar Qazaqstan joǵary oqý oryndarynyń dıplomdary Azııanyń birneshe elinde moıyndalatyny, bul túlekterge qosymsha mansaptyq múmkindikter ashatyny erekshe kórsetildi.
- Jeke atap ótilgen taqyryp — sheteldik stýdentterdi qoldaýǵa arnalǵan memlekettik mehanızm. Qazaqstan jyl saıyn sheteldik stýdentterge oqý, turý jáne basqa da shyǵystardy tolyq qamtıtyn 500-den astam grant usynady. Bul bastama — halyqaralyq gýmanıtarlyq yntymaqtastyqty keńeıtýdiń mańyzdy quraly. Sondaı-aq taraptar Taılandta «Study in Kazakhstan» formaty boıynsha bilim kórmelerin ótkizý perspektıvalaryn talqylady. Bul kórmelerde Qazaqstan ýnıversıtetteri óz baǵdarlamalaryn, ǵylymı jetistikterin jáne túsý sharttaryn tanystyrýǵa múmkindik alady. Mundaı is-sharalar eki el ýnıversıtetteri arasyndaǵy akademııalyq baılanystardy jáne tikeleı qatynastardy keńeıtý úshin tıimdi alań bolatyny atap ótildi, - delingen aqparatta.
Kezdesý qorytyndysy boıynsha taraptar stýdentter men oqytýshylar almasýyn, birlesken bilim baǵdarlamalary men ǵylymı jobalardy damytýǵa ózara qyzyǵýshylyqtaryn bildirdi. Qol jetkizilgen kelisimder Qazaqstan men Taıland arasyndaǵy joǵary bilim jáne ǵylym salasyndaǵy seriktestikti nyǵaıtýǵa jańa múmkindikter ashatyny erekshe atap ótildi.
Aıta keteıik, elimizde 88 memleketten kelgen 30 myńnan astam sheteldik stýdent bilim alyp jatyr.