Qazaqstan halyqaralyq bankten 85 mlrd ıen qaryz alady
ASTANA. KAZINFORM – Parlament Májilisiniń qaraýyna «Qazaqstan Respýblıkasy men Halyqaralyq Qaıta Qurý jáne Damý banki arasyndaǵy qaryz týraly kelisimdi ratıfıkatsııalaý týraly» zań jobasy kelip tústi.
Zań jobasy 2024 jylǵy 18 qarashada Úkimet qaýlysymen engizildi.
«Atalǵan kelisim 2024 jylǵy 11 qazanda Astanada jasalǵan. Halyqaralyq Qaıta Qurý jáne Damý bankiniń qaryzy Qazaqstan Respýblıkasyna 84,9 mlrd ıen somasynda beriledi. Ony óteý merzimi - 11 jyl. Qaryz qarajaty el ekonomıkasynyń turaqtylyǵyn qoldaý úshin tartylyp jatyr. Májilistiń Qarjy jáne bıýdjet komıteti osy zań jobasy boıynsha qorytyndy ázirleýge daıyn», - dedi palata depýtaty Tatıana Saveleva Májilistiń jalpy otyrysynda.
Budan buryn habarlanǵandaı, jaqynda Parlament Májilisiniń qaraýyna «Qazaqstan men Azııa Damý Banki arasyndaǵy qaryz týraly kelisimdi ratıfıkatsııalaý týraly» zań jobasy jáne «Qazaqstan men Azııa Infraqurylymdyq Investıtsııalar Banki arasyndaǵy qaryz týraly kelisimdi ratıfıkatsııalaý týraly» zań jobasy kelip tústi. Osy eki qujat boıynsha jalpy qaryz kólemi 105 mlrd ıendi quraıdy.