Qazaqstan Halyq partııasynyń BQO fılıaly Konstıtýtsııa jobasyn talqylady
ORAL. KAZINFORM — Qazaqstan Halyq partııasynyń BQO fılıaly Konstıtýtsııanyń jańa jobasyn túsindirý maqsatynda partııa aktıvimen kezdesý ótkizdi.
Jıyn barysynda Konstıtýtsııa jobasynyń negizgi baptary jóninde túsinik berilip, Qazaqstan Halyq partııasynyń ustanymy ortaǵa salyndy. Sondaı-aq konstıtýtsııalyq ózgeristerdi júzege asyrýdaǵy qoǵamdyq-saıası ınstıtýttardyń róli týraly aıtyldy.
Іs-sharada Qazaqstan Halyq partııasy BQO fılıalynyń tóraǵasy, oblystyq máslıhattyń depýtaty Borıs Lavrentev sóz sóılep, konstıtýtsııalyq reformanyń eldiń qoǵamdyq jáne saıası ómirindegi mańyzdy oqıǵa ekendigine toqtaldy. Ol Qazaqstan Halyq partııasynyń Konstıtýtsııanyń jańa jobasyn qoldaıtyndyǵyn, muny Qazaqstan Prezıdenti Qasym-Jomart Toqaevtyń saıası reformalaryn júzege asyrýdaǵy jáne «Ádiletti Qazaqstan» qurýdaǵy zańdy kezeń retinde qarastyratynyn atap ótti.
— Konstıtýtsııa — memlekettiń irgetasy. Sondyqtan ol ýaqyt aǵynyna tótep beretindeı berik, sonymen qatar jańa ómirge beıimdeletindeı ıkemdi bolýy qajet. 2026 jylǵy reforma jan-jaqty oılastyrylǵan jáne bolashaq jańartýǵa baǵyttalǵan osyndaı naqty úlgi boldy. Sonyń ishinde bir palataly Parlament qurý negizgi sheshimderdiń birine aınaldy. Bul qadam zań shyǵarýdyń tıimdiligin arttyrýǵa, bıýrokratııalyq kedergilerdi qysqartyp, el úshin mańyzdy sheshimderdi qabyldaýdy jedeldetýge baǵyttalǵan. Bir palataly qurylym Parlament jumysyn barynsha ashyq, azamattar úshin barynsha túsinikti qylyp, qoǵamnyń naqty saýaldaryna beıimdelýine múmkindik beredi. Aýqymdy tez ózgerister jaǵdaıynda mundaı úlgi memlekettiń tabysty damýy úshin qajetti ıkemdilik pen jedeldikti qamtamasyz etedi. Bir palataly Parlamentke kóshý týraly usynys Qazaqstan Halyq partııasynyń baǵdarlamasynda jazylǵan, — dedi B.Lavrentev.
Kezdesýge qatysqan Qazaqstan Halyq partııasynyń músheleri Álibı Orazov, Arman Myrzahmetov qoǵamnyń damýyna baılanysty ózgerister qajettigin aıtyp, partııalastaryn Konstıtýtsııa jobasyn qoldaýǵa shaqyrdy.
Eske sala keteıik, budan buryn Batys Qazaqstan oblysynyń aktıvi Konstıtýtsııanyń jobasyn qoldaǵanyn jazǵan edik.