Qazaqstan Halyq partııasyna 40 jastaǵy Nursultan Shoqanov tóraǵa boldy
ASTANA. KAZINFORM – Ermuhamet Ertisbaev Qazaqstan Halyq partııasynyń tóraǵalyǵynan ketip, ornyna Nursultan Shoqanov saılandy
Parlament saılaýynyń aldyndaǵy partııa sezinde burynǵy tóraǵa Ermuhamet Ertisbaev sońǵy úsh jyldaǵy jumystyń qorytyndysyn shyǵaryp, basshylyqtyń jańarýy partııa damýynyń tabıǵı kezeńi ekenin aıtty.
Partııanyń resmı saıty Ddelegattardyń basym daýysymen Nursultan Shoqanov QHP tóraǵasy bolyp saılanǵanyn habarlady.
Sezde delegattar partııa Jarǵysynyń jańartylǵan nusqasy men jańa aıdentıkasyn da bekitken.
Nursultan Shoqanov 1986 jyly Almaty qalasynda dúnıege kelgen. Menedjment, ekonomıka jáne boljaý jónindegi Qazaqstan ınstıtýtyn (KIMEP) «Qarjy» mamandyǵy boıynsha támamdaǵan. Keıin Shveıtsarııadaǵy IMD bıznes-mektebinde Executive MBA dárejesin alǵan.
Eńbek jolyn halyqaralyq Ernst & Young aýdıtorlyq kompanııasynda bastaǵan. Keıin «Sandrıllıng» munaı servıstik kompanııasynda basshylyq qyzmetter atqaryp, korporatıvtik qarjyǵa, ákimshilik basqarýǵa, sondaı-aq daǵdarysqa qarsy basqarý máselelerine jetekshilik etken.
2009 jyldan beri kásipkerlikpen aınalysady. Qoǵamdyq tamaqtaný, azyq-túlik jetkizý, bólshek saýda, aqparattyq tehnologııalar, óndiris jáne dıstrıbýtsııa salalarynda jumys isteıtin OMIR Group kompanııalar tobynyń dırektorlar keńesin basqarady. Búginde top quramyndaǵy kásiporyndar Qazaqstannyń alty qalasy men tórt memlekette jumys isteıdi.
2021 jyldan bastap Qazaqstan Halyq partııasynan Almaty qalasy máslıhatynyń VII jáne VIII shaqyrylym depýtaty boldy. Onda qurylys, sáýlet, qalalyq ınfraqurylym, ýrbanıstıka jáne jer qatynastary máseleleri jónindegi beıindi komıssııalardy basqardy.
2022 jylǵy jeltoqsannan bastap Qazaqstan Halyq partııasynyń Almaty qalalyq, keıin Almaty oblystyq fılıaldaryn basqardy.
2023 jyly Almaty qalasynyń «Atameken» óńirlik kásipkerler palatasynyń tóraǵasy boldy. Keıin «Atameken» Ulttyq kásipkerler palatasy basqarmasynyń múshesi – basqarma tóraǵasynyń orynbasary bolyp saılandy.
Sondaı-aq, ol Alpınızm jáne sporttyq quzǵa órmeleý federatsııasynyń prezıdenti.
Buǵan deıin «Aq jol» demokratııalyq partııasy men «Aýyl» partııasynyń tóraǵalary da aýysqanyn jazǵanbyz.
