Qazaqstan halyq partııasy Quryltaı depýtattyǵyna 72 kandıdatty bekitti
ASTANA. KAZINFORM – Astanada Qazaqstan halyq partııasynyń XXV kezekten tys sezi ótti. Onda partııanyń saılaýaldy baǵdarlamasy qabyldanyp, Quryltaı depýtattyǵyna usynylatyn 72 kandıdattyń tizimi jáne Saıası keńestiń jańa quramy bekitildi.
Partııalyq tizimge jýrnalıster, qoǵam qaıratkerleri, zańgerler, ekonomıster, dárigerler, pedagogter, ǵalymdar, kásipkerler men mádenıet salasynyń ókilderi endi. Partııa málimetinshe, kandıdattardy irikteýde kásibı biliktilik, eńbek tájirıbesi jáne naqty jetistikter negizgi ólshem boldy.
Sezde keltirilgen málimetke sáıkes, kandıdattardyń ortasha jasy – 45. Tizimdegi 35 jasqa deıingi jastardyń úlesi 12 paıyz bolsa, áıelder 24 paıyz.
Qazaqstan halyq partııasynyń tóraǵasy Nursultan Shoqanov partııa el múddesine qyzmet ete alatyn bilikti komanda jasaqtaǵanyn aıtty. Onyń sózinshe, tizimge kásibı tájirıbesi mol, eńbegimen tanylǵan azamattar engizilgen.
– Kandıdattarymyzdyń sany 72 adamǵa jetti. Olardy kásibılik, tájirıbe jáne naqty eńbek nátıjesi biriktiredi. Biz laýazymy men tanymaldyǵyna emes, bilimine, jaýapkershiligine jáne el ıgiligi jolynda eńbek etýge daıyndyǵyna basymdyq berdik. Bul komanda azamattardyń senimin aqtap, aldaǵy saılaýda Qazaqstan halyq partııasyn laıyqty tanystyrady dep senemin, – dedi ol.
Sezde partııanyń 19 bólimnen turatyn saılaýaldy baǵdarlamasy da bekitildi. Onda bilim men ǵylymdy damytý, ekologııa, áleýmettik saıasat, halyqtyń turmys sapasyn arttyrý, eń tómengi jalaqy mólsherin kóbeıtýge qatysty bastamalar qamtylǵan. Qatysýshylardyń aıtýynsha, qujat eldiń ár óńirinen túsken usynystar men ótinishter negizinde ázirlengen.
Partııa ekonomıkalyq ósim men áleýmettik jaýapkershiliktiń qatar júrýin basty ustanym retinde atady. Baǵdarlamada azamattardyń ómir sapasyn jaqsartý, óńirler men aýyldardy damytý, otbasylardy qoldaý, bilim berý men densaýlyq saqtaý júıesin jetildirý, azamattardyń quqyqtaryn qorǵaý, qaýipsizdik pen áleýmettik ádildikti qamtamasyz etý máselelerine basymdyq berilgen.
Sezde Parlamenttegi partııa fraktsııasynyń jumysy da qorytyndylandy. Osy shaqyrylym barysynda depýtattar úsh zań jobasyn ázirlep, zańnamaǵa 1,5 myńnan astam túzetý usynyp, 600-ge jýyq depýtattyq saýal joldaǵan.
Júzege asqan bastamalardyń qatarynda balalarǵa pasport rásimdeý qunyn tómendetý, kolledj stýdentteriniń shákirtaqysyn kóbeıtý, qoǵamdyq oryndardaǵy órt qaýipsizdigi talaptaryn kúsheıtý, tótenshe jaǵdaılar qyzmetkerleriniń mártebesin kóterý, erekshe qajettiligi bar balalardyń ata-analaryn bilim grantyn óteý mindetinen bosatý jáne Pavlodardaǵy keme jóndeý zaýytyn saqtap qalý bar.
Sezde sońǵy ýaqytta Qazaqstan halyq partııasynyń qataryna 43 myńnan astam jańa múshe qabyldanǵany da aıtyldy. Qatysýshylar muny partııaǵa degen qoǵamdyq qoldaýdyń kúsheıgeniniń kórinisi dep baǵalady.
Sezd qorytyndysynda partııa saılaýaldy baǵdarlamasy men kandıdattar quramyn tanystyryp, Quryltaı depýtattary saılaý naýqanyna resmı túrde kiriskenin jarııalady.
Buǵan deıin «Aýyl» partııasy Quryltaı depýtattaryn saılaýǵa qatysatyn 69 kandıdatty bekitken bolatyn.
