Qazaqstan Halyq partııasy Qyzylorda fılıaly jańa Konstıtýtsııa jobasyn qoldaıdy
QYZYLORDA. KAZINFORM - Búgin Qazaqstan Halyq partııasynyń Qyzylorda oblystyq fılıalynda partııa aktıviniń qatysýymen Qazaqstan Respýblıkasy Konstıtýtsııasynyń jańa jobasyn jan-jaqty túsindirýge arnalǵan kezdesý ótti.
Kezdesýde fılıal tóraǵasynyń orynbasary Araılym Baıjigitova negizgi zań jobasyna engizilip otyrǵan ózgerister men tolyqtyrýlar el damýyna, memlekettik basqarý júıesin jetildirýge, azamattardyń quqyǵy men bostandyǵyn qorǵaýǵa yqpal etetinin jetkizdi.
- Bul qujat memlekettiń strategııalyq damý baǵytyn, saıası júıeniń sıpatyn jáne qoǵamdyq damýdyń basymdyqtaryn aıqyndaıtyn mańyzdy negiz bolmaq. Qazaqstan Halyq partııasy Konstıtýtsııalyq komıssııa usynǵan jańa Konstıtýtsııa jobasyn tolyq qoldaıdy. Biz bul qujatty Qazaqstan Respýblıkasy Prezıdenti Qasym-Jomart Kemeluly Toqaevtyń saıası reformalar baǵdarlamasyn iske asyrýdaǵy jáne «Ádiletti Qazaqstandy» qurý jolyndaǵy zańdy ári kútilgen kezeń retinde baǵalaımyz, - dedi ol.
Jıynda Qorqyt ata atyndaǵy Qyzylorda ýnıversıtetiniń aǵa oqytýshysy Talǵat Teleýbaev, Qorqyt ata atyndaǵy Qyzylorda ýnıversıtetiniń quqyqtaný bilim berý baǵdarlamasynyń aǵa oqytýshysy, zańtaný magıstri Jadyra Shúkenova, «Bolashaq» ýnıversıteti quqyqtaný jáne qoǵamdyq pánder kafedrasynyń aǵa oqytýshysy, zań ǵylymdarynyń magıstri Aıgúl Ábdikerova jańa Konstıtýtsııa jobasy halyq talqysynan týǵanyn atap ótti.
Basqosýda partııanyń konstıtýtsııalyq reformalarǵa qatysty ustanymdary, saıası jańǵyrý jolyndaǵy bastamalary men aldaǵy kezeńge arnalǵan jospary tanystyryldy. Kezdesý barysynda partııa aktıvi usynystary men pikirlerin ortaǵa salyp, ózekti máseleler boıynsha suraqtarǵa jaýap berdi.
Búgin sondaı-aq Qazaqstan Halyq partııasynyń BQO fılıaly Konstıtýtsııanyń jańa jobasyn túsindirý maqsatynda partııa aktıvimen kezdesý ótkizdi.