Qazaqstan Halyq Keńesiniń músheleri Qaraǵandy oblysynda ekologııalyq aktsııaǵa qatysty

ASTANA. KAZIFORM – 7 qarashada Qaraǵandy oblysynda «Birlik – Taza Qazaqstan úshin» dástúrli ekologııalyq aktsııasy bastaldy. Turǵyndar, volonterler men qoǵam belsendileri Molodejnyı eldi mekeni men oǵan irgeles aýmaqtardy abattandyrý jáne kógaldandyrý jumystaryna atsalysty.

Halyq Keńesiniń músheleri Qaraǵandy oblysynda ekologııalyq aktsııaǵa qatysty
Foto: Qazaqstan Halyq Keńesi

Igi is-sharaǵa Qazaqstan Halyq Keńesiniń Tóraǵasy Erlan Qoshanov, Qaraǵandy oblysynyń ákimi Ermaǵanbet Bólekpaev, Ivan Georgıadı bastaǵan «Birlik» qoǵamdyq tobynyń músheleri, sondaı-aq respýblıkalyq etnomádenı birlestikter men qoǵamdyq uıymdardyń jetekshileri qatysty. Shamamen 2000 adam qoldaý bildirgen joba aýmaqty abattandyrý men kógaldandyrýǵa baǵyttaldy.

Qazaqstan Halyq Keńesiniń músheleri Qaraǵandy oblysynda ekologııalyq aktsııaǵa qatysty
Foto: Qazaqstan Halyq Keńesi

Memleket basshysy Qasym-Jomart Toqaev «Jańa tarıhı kezeńindegi Qazaqstannyń ózekti mindetteri» atty Joldaýynda qorshaǵan ortaǵa uqypty qaraýdyń mańyzdylyǵyna erekshe toqtaldy. Prezıdent «Taza Qazaqstan» bastamasy bir rettik aktsııa emes, árbir azamattyń ómir saltyna aınalýy tıis ekenin birneshe ret atap ótken bolatyn. Bul rette áńgime tek kóshelerdiń tazalyǵy týraly ǵana emes, aınalamyzdaǵy tártip pen tazalyqtyń bastaýy sanalatyn oı tazalyǵy men ishki mádenıet týraly da bolyp otyr.

Sol kúni eldi mekenniń ártúrli aýmaqtaryna barlyǵy 500 túp iri kólemdi kóshet otyrǵyzyldy. Sonymen qatar jańa alleıalardyń kútimine erekshe nazar aýdarylyp, aǵashtardyń jergilikti klımatqa beıimdelip, jaqsy tamyr jaıýy úshin aldaǵy ýaqytta da kútip-baptaý jumystary júrgiziletinine mán berildi.

Qazaqstan Halyq Keńesiniń músheleri Qaraǵandy oblysynda ekologııalyq aktsııaǵa qatysty
Foto: Qazaqstan Halyq Keńesi

Qazaqstan Halyq Keńesi janyndaǵy «Birlik» toby etnomádenı birlestikterdiń ókilderin biriktiredi. Top etnosaralyq kelisimdi nyǵaıtýmen qatar, jalpyulttyq mańyzy bar mindetterdi júzege asyrýǵa, qoǵamdyq bastamalardy qoldaýǵa jáne óńirlerdi damytýǵa baǵyttalǵan jumystarǵa belsendi atsalysady. Molodejnyı kentinde ótken aktsııa – túrli etnos ókilderiniń ortaq maqsat jolynda birlese áreket etýiniń jarqyn kórinisi. Sonymen qatar bul bastama Memleket basshysy ustanymyndaǵy «Birlik – áralýandyqta» qaǵıdatyn naqty ispen kórsetip, onyń mazmunyn jańa serpinmen tolyqtyrdy.

«Birlik» qoǵamdyq tobynyń tóraǵasy Ivan Georgıadıdiń aıtýynsha, bul – jalpyulttyq mańyzy bar aýqymdy aktsııa. Onyń atap ótýinshe, Memleket basshysy óz úlgisimen árbir azamatty ortaq iske atsalysýǵa shaqyrady. Sebebi elimizdi kórkeıtip, jasyl jelekke bólep, taza ári ásem etý – barshamyzǵa ortaq mindet. Bul – ózimiz ómir súrip jatqan, balalarymyz ben keleshek urpaqqa mura bolyp qalatyn ortaq Otanymyz. Sondaı-aq ol mundaı ıgi bastamalar jyl saıyn jalǵasyn taýyp, el ıgiligine baǵyttalǵan jaqsy dástúrge aınalýy tıis ekenine nazar aýdardy.

Qazaqstan Halyq Keńesiniń músheleri Qaraǵandy oblysynda ekologııalyq aktsııaǵa qatysty
Foto: Qazaqstan Halyq Keńesi

Óz kezeginde, Qazaqstan Halyq Keńesiniń múshesi Aqbarjon Ismaılov búgingi tańda bul mańyzdy bastama elimizdiń barlyq óńirin qamtyp otyrǵanyn aıtty. Qazaqstan Halyq Keńesiniń músheleri de Halyq Keńesi janynan qurylǵan «Birlik» tobynyń qoldaýymen uıymdastyrylǵan aýqymdy aktsııaǵa belsendi túrde qatysýda. Onyń aıtýynsha, mundaı bastamalar árbir azamattyń óz eline degen súıispenshiligi men qurmetin, sondaı-aq týǵan jerdiń tazalyǵy men ıgiligine degen jaýapkershiligin aıqyn kórsetedi.

«Taza Qazaqstan» bastamasy osy birlikti naqty ister arqyly kórsetedi. Qazaqstan Halyq Keńesi úshin mundaı aktsııalar – qoǵamdyq kelisimdi nyǵaıtýǵa baǵyttalǵan júıeli jumystyń bir bóligi. Bul rette etnomádenı birlestikter elimiz úshin ortaq mańyzdy isterge óz úlesterin qosyp keledi. Sonymen qatar turǵyndardyń birlesken jumysy Memleket basshysynyń tapsyrmalarynyń sapaly ári ýaqtyly oryndalýyna qatysty qoǵamdyq baqylaýdy kúsheıtýge de yqpal etetini atap ótildi.

Qazaqstan Halyq Keńesiniń músheleri Qaraǵandy oblysynda ekologııalyq aktsııaǵa qatysty
Foto: Qazaqstan Halyq Keńesi

Aktsııany uıymdastyrýǵa «Birlik» qoǵamdyq tobynyń tóraǵasy Ivan Georgıadı basqaratyn «Evrazııa Invest LTD» JShS qoldaý kórsetti. Kompanııa ókilderi aldaǵy ýaqytta da osyndaı ekologııalyq bastamalardy kóshetpen qamtamasyz etýge daıyn ekendikterin jetkizdi. Jumys sapary barysynda Qazaqstan Halyq Keńesiniń músheleri óńirdiń agroónerkásiptik áleýetimen de tanysty. Atap aıtqanda, sút-taýar fermasy men kásiporynnyń kóshet sharýashylyǵynda bolyp, ondaǵy jumystardyń barysymen tanysty.

Aktsııa qorytyndysy boıynsha «Birlik» tobynyń músheleri ony jylyna eki ret ótkizip, ıgi dástúrge aınaldyrýdy, sondaı-aq osy tájirıbeni elimizdiń basqa óńirlerine de taratyp, mundaı bastamalarǵa jergilikti etnomádenı birlestikterdi belsendi tartýdy usyndy. Qatysýshylar barsha qazaqstandyqtardy qorshaǵan ortanyń tazalyǵy men tártibin turaqty saqtaýǵa shaqyryp, tabıǵatqa janashyrlyqpen qaraý kúndelikti ómir saltymyzdyń ajyramas bóligine aınalýy kerektigin atap ótti.

Taza Qazaqstan
Foto: Qazaqstan Halyq Keńesi

Osyǵan deıin Memleket basshysy Qasym-Jomart Toqaevtyń bastamasymen júzege asyrylyp jatqan «Taza Qazaqstan» jalpyulttyq ekologııalyq baǵdarlamasy aıasynda bilim berý uıymdarynda ekologııalyq mádenıetti qalyptastyrý jáne tabıǵı resýrstardy uqypty paıdalanýǵa tárbıeleý baǵytyndaǵy jumystar júrip jatqany týraly jazdyq.