Qazaqstan Halyq Keńesiniń quramy men turaqty komıtetteriniń tóraǵalary bekitildi

Otyrysty asha otyryp, Erlan Qoshanov el Prezıdenti Qasym-Jomart Toqaev Qazaqstan Halyq Keńesiniń aldyna qoǵamdyq kelisim men birlikti nyǵaıtýǵa, azamattardyń memlekettik basqarýǵa qatysýyn keńeıtýge, sondaı-aq qoǵam men memleket arasyndaǵy dıalogty nyǵaıtýǵa baǵyttalǵan memlekettik aýqymdaǵy mindetter qoıǵanyn atap ótti. Atap aıtylǵandaı, azamattar men bılik arasyndaǵy qashyqtyqty qysqartatyn jáne halyqtyń únin anaǵurlym salmaqty etetin jańa ınstıtýttyń tereń fılosofııasy dál osynda jatyr, sondaı-aq Qazaqstan Halyq Keńesi Prezıdenttiń senim mandatyn naqty jumyspen jáne naqty nátıjelermen aqtaýy tıis ekenin qosty.

– Búgin biz Halyq Keńesi Tóralqasynyń alǵashqy otyrysyn ótkizip otyrmyz. Jýyrda ǵana barshamyz el tarıhyndaǵy eleýli oqıǵanyń kýási boldyq. Jańa konstıtýtsııalyq ınstıtýt óz jumysyn bastady. Munyń artynda Memleket basshysynyń sońǵy jyldardaǵy aýqymdy, tabandy ári eseli eńbegi tur. Prezıdentimiz Halyq Keńesiniń aldyna mańyzdy mindetter qoıdy. Olar – birlik pen qoǵamdyq kelisimdi nyǵaıtý, azamattardyń memleket isine aralasý múmkindigin keńeıtý, qoǵam men memlekettiń ózara baılanysyn jańa beleske kóterý. Halyq Keńesiniń máni de, tarıhı mıssııasy da osynda. El Prezıdenti artqan osy zor senimge biz naqty ispen, nátıjeli jumyspen jaýap berýge tıispiz, – dedi Erlan Qoshanov.

Tóralqa otyrysynyń barysynda úsh negizgi komıtettiń quramy bekitilip, basshylary taǵaıyndaldy. Qoǵamdyq bastamalardy damytý komıtetin Vera Kım, Qoǵamdyq kelisim jáne jalpyulttyq birlik baǵytyn Marat Ázilhanov basqarady. Al Óńirlik damý jáne jergilikti ózin-ózi basqarý komıtetiniń jetekshisi bolyp Tabıǵat Zeınulqabden taǵaıyndaldy.

Komıtetterdiń quramyn bekitý jáne jetekshilerin taǵaıyndaý Qazaqstan Halyq Keńesiniń strategııalyq mindetterin júıeli, sapaly jáne tıimdi iske asyrýdy qamtamasyz etýge, sondaı-aq konstıtýtsııalyq konsýltatıvtik organ qyzmetiniń asa mańyzdy baǵyttary boıynsha saraptamalyq jumysty kúsheıtýge baǵyttalǵan.

Osyǵan baılanysty, komıtetterdiń qyzmet erekshelikterin eskere otyryp jáne ǵylymı-sarapshylyq qoǵamdastyqty tarta otyryp, aldaǵy kezeńge arnalǵan negizgi mindetterdi iske asyrý tóńireginde pikir almasý ótti.

Negizgi nazar Birlik pen kelisimniń jańa tujyrymdamasyna aýdaryldy. Halyq Keńesiniń músheleri bul jumysqa belsendi túrde aralasyp, etnomádenı birlestikterdi shoǵyrlandyrýǵa yqpal etý sııaqty, bul iske de ózderiniń mazmundy úlesterin qosý qajet degen ortaq pikirge keldi.

Otyrysta óńirlermen ózara is-qımyldy keńeıtý, qoǵamdyq baqylaýdy júzege asyrý, máslıhattar men qoǵamdyq keńesterdi qoldaý tetikteri de talqylandy.

Óńirlerdegi azamattardyń usynystarymen jumys isteý máselesine de aıryqsha mán berildi. Qazaqstan Halyq Keńesiniń múshesi Baǵdat Mýsın atap ótkendeı, bastamalar leginiń artýy kútiletindikten, olardy júıeli jınaý, óńdeý jáne monıtorıngileý úshin biryńǵaı aqparattyq platforma ázirleý usynylady. Bul júıe árbir ótinishtiń qaralý barysyn jáne ol boıynsha qabyldanǵan sheshimderdi qadaǵalap otyrýǵa múmkindik beredi. Sonymen qatar atalǵan aqparattyq júıe Memleket basshysy belgilegen negizgi ıdeologııalyq baǵdarlardy iske asyrýdyń pármendi quraldarynyń birine aınalady.

Budan bólek, azamattardyń memleketti basqarýǵa tikeleı qatysýynyń jańa quraldaryn qurý týraly sóz boldy. Sarapshylardyń pikirinshe, búginde elde kóptegen qoǵamdyq jáne konsýltatıvtik-keńesshi organdar jumys isteıdi. Biraq olardyń jumysy jıi shashyrańqy bolyp keledi, al fýnktsııalary bir-birimen qaıtalanady. Sondyqtan bul jerde Halyq Keńesi óz rólin atqarýy tıis: osy áleýetti biriktirip, ózara is-qımyldy jolǵa qoıý jáne jumysty júıeleý kerek. Mundaı tásil jańa Konstıtýtsııaǵa sáıkes zamanaýı syn-qaterlerge memleket pen azamattardyń birlesken jaýaptaryn ázirleýdiń tıimdi alańyna aınala otyryp, dıalogtyń jańa mádenıetin qalyptastyrýǵa baǵyttalǵan.

Organnyń jumys tártibi zańnamamen jáne ishki Erejemen reglamenttelgen, al onyń quramy Halyq Keńesi músheleriniń arasynan jasaqtalady.

Aıta keteıik, Tóralqa quramyna Qazaqstan Halyq Keńesiniń basshylyǵymen jáne turaqty komıtetterdiń tóraǵalarymen qatar Bekmurat Júsipov, Narıne Mıkaelıan, Denıs Rypakov jáne Nurtaı Sabılıanov kirdi.