Qazaqstan Halyq Keńesiniń quramy: 126 músheniń arasynda kimder bar
ASTANA. KAZINFORM — Prezıdent Qasym-Jomart Toqaev Qazaqstan Halyq Keńesiniń 126 adamnan turatyn quramyn bekitti. Kazinform tilshisi olardyń arasynda qansha er adam men áıel baryn, buryn depýtat jáne memlekettik qyzmette bolǵandar sanyn, sondaı-aq Keńeste qandaı salalar men uıymdardyń ókilderi baryn anyqtap kórdi.
Qazaqstan Halyq Keńesiniń quramyna 126 adam kirdi. Olardyń ókilettik merzimi tórt jyldy quraıdy. Keńes úsh baǵyt boıynsha árqaısysynan 42 músheden qalyptastyrylady:
-
etnomádenı birlestikterden;
-
iri qoǵamdyq birlestikter men ózge de kommertsııalyq emes uıymdardan;
-
máslıhattar men qoǵamdyq keńesterden.
Qazaqstan Halyq Keńesinde elimizdiń barlyq óńiri ókildik etedi.
QHK quramynda máslıhattar men qoǵamdyq keńesterden qansha adam bar?
Ókildi organdardan Qazaqstan Halyq Keńesiniń quramyna 20 máslıhat depýtaty kirdi. Olardyń beseýi máslıhat tóraǵasy: ekeýi respýblıkalyq mańyzy bar qalalardyń, úsheýi oblystardyń máslıhatyn basqarady.
Olardyń keıbiriniń negizgi qyzmeti de bar. Atap aıtqanda, Keńes quramynda aýrýhana, kitaphana, metallýrgııa zaýyty, sport klýby, sport federatsııasy jáne Kásipkerler palatasynyń óńirlik keńesin basqaratyn adamdar bar.
Qazaqstan Halyq Keńesiniń taǵy 22 múshesi oblystyq jáne qalalyq qoǵamdyq keńesterdiń ókilderi. Olardyń tórteýi qoǵamdyq keńes tóraǵasy.
Parlamenttegi tájirıbesi barlar
Qazaqstan Halyq Keńesiniń 16 múshesiniń Parlamentte jumys tájirıbesi bar. Onyń 13-i Májiliste, tórteýi Senatta jumys istegen. Bir adam Parlamenttiń qos palatasynda da depýtat bolǵan.
Kópshiligi Parlamenttiń sońǵy shaqyrylymdarynan kelgen: toǵyz adam — VIII shaqyrylym Májilisinen, úsheýi — Senattyń sońǵy quramynan. Taǵy tórt adam Parlamentten ókilettik merzimi aıaqtalmaı turyp ketken.
QHK quramynda taǵy kimder bar?
Konsýltatıvtik organ quramyna 40 áıel men 86 er adam kirdi. Áıelderdiń úlesi — 31,7%. Sonymen qatar Keńes quramynda túrli etnos ókilderiniń sany 46 adamdy, ıaǵnı 36,5%-dy quraıdy.
Olardyń arasynda ǵalymdar, onyń ishinde Ulttyq ǵylym akademııasynyń úsh akademıgi, sondaı-aq pedagogter, dárigerler, jýrnalıster, jazýshylar, advokattar, kásipodaq jetekshileri men kásipkerler bar.
Keńes quramyna Olımpıada chempıony, Olımpıada oıyndarynyń kúmis júldegeri jáne sport federatsııalarynyń basshylary da kirdi. Sondaı-aq eki burynǵy mınıstr men «Qazaqstannyń Eńbek Eri» ataǵyn alǵan úsh azamat bar.
Eske salaıyq, búgin Memleket basshysynyń Jarlyǵymen Qazaqstan Halyq Keńesiniń quramy bekitildi. Keńes músheleriniń tolyq tizimimen osy jerden tanysýǵa bolady.
Qazaqstan Halyq Keńesiniń alǵashqy sessııasy 23–24 qyrkúıekte Astanada ótedi. Ony ótkizý týraly tıisti ókimge Qazaqstan Prezıdenti qol qoıǵan.
