Qazaqstan Halyq Keńesinde óńirlerdi damytý máseleleri qaraldy

Onda Memleket basshysynyń azamattyq qoǵam ınstıtýttaryna júktegen mindetterin iske asyrý máseleleri qaraldy. Negizgi kún tártibin talqylaýǵa Qazaqstan Halyq Keńesi Tóraǵasynyń orynbasary — Hatshylyq basshysy Qanatbek Jaısanbaev qatysty.

Otyrys barysynda Halyq Keńesiniń músheleri óńirlik damý jáne kásipkerlikti qoldaý, ekologııa jáne áleýmettik jaýapkershilik jónindegi salalyq komıssııalarǵa bólindi. Sondaı-aq otyrystyń kún tártibine Komıtet qyzmetin uıymdastyrýshylyq qamtamasyz etý máseleleri engizilip, salalyq komıssııalardyń erejeleri bekitildi jáne jumystyń negizgi baǵyttary aıqyndaldy.

Osy baǵytta Komıtet tóraǵasy Tabıǵat Zeınulqabden Memleket basshysy bastamashy bolǵan jalpyulttyq reformalardy iske asyrýdaǵy Halyq Keńesiniń erekshe róline toqtaldy. Eń aldymen, atap ótilgendeı, qoǵamdyq keńestermen jumysty ózara úılestirýge basa nazar aýdarylmaq.

— Qazaqstan Halyq Keńesiniń Óńirlik damý jáne jergilikti ózin-ózi basqarý komıtetiniń qyzmeti qoǵamdyq keńesterdiń ózara is-áreketiniń tıimdiligin arttyrýǵa, sondaı-aq azamattyq qoǵamnyń negizgi bastamalaryn biriktirýge jáne saraptamalyq turǵyda qoldaýǵa baǵyttalǵan. Jumystyń basym baǵyttarynyń biri — qoǵamdyq suranystardy anyqtaý, olardy saraptamalyq turǵydan zerdeleý jáne Qazaqstan Halyq Keńesiniń qaraýyna engizý úshin naqty usynystar men usynymdar ázirleý bolady, — dep Tabıǵat Zeınulqabden Komıtettiń negizgi mindetterine toqtaldy.

Saraptamalyq talqylaý men pikir almasý barysynda qatysýshylar birqatar bastama men usynysty ortaǵa saldy. Erlan Nysanbaev «Taza Qazaqstan» ekologııa máselesin praktıkalyq turǵyda iske asyrýda Qazaqstan Halyq Keńesiniń mańyzdy ról atqaratynyna mán berdi.

— Memleket basshysy Qasym-Jomart Kemeluly Toqaev «Qazirgi ekologııa tek klımat máselesimen shektelmeıdi. Bul — adamzat tirshiliginiń túp negizi» dep atap ótti. Shynynda da, ekologııa tek tabıǵatty qorǵaýdan turmaıdy. Oǵanazamattyq jaýapkershilikpen, quqyqtyq sanamen jáne bolashaq urpaq aldyndaǵy paryzymyz dep qaraý kerek. Ekologııalyq mádenıet biz úshin tańsyq uǵym emes, ol ulttyq qundylyqtarymyzdyń negizi. Halqymyzdyń «Bir tal kesseń, on tal ek», «Sýdyńda suraýy bar» degen qanatty sózderi tabıǵatty qorǵaý men aıalaý qanymyzda erteden bar qasıet ekenin dáleldeıdi. Osy ustanym azamattardyń kúndelikti ómir saltyna aınalýy tıis, — dedi ol.

Óz kezeginde, «ECO Network» jobasynyń negizin qalaýshy, EN Social qoǵamdyq qorynyń dırektory Evgenıı Mýhamedjanov jańa Konstıtýtsııanyń qurylymy anaǵurlym aıqyn ekenin jáne memleketti damytýdyń ózekti baǵdarlaryn kórsetetinine nazar aýdardy. Ol mańyzdy ózgeristerdiń biri retinde ekologııalyq mádenıettiń erekshe mártebesiniń bekitilýin atap, ony qalyptastyrý qajettigin aıtty. Osy maqsatta Halyq Keńesiniń múshesi birqatar naqty shara usynyp, sondaı-aq ozyq halyqaralyq tájirıbelerimen bólisti.

— Búginde «Taza Qazaqstan» — Prezıdenttiń Konstıtýtsııada bekitilgen negizgi baǵdarlamalarynyń biri. Onyń mańyzy ulttyq mádenıetten de joǵary deńgeıde aıqyndalǵan. Menińshe, bul durys, óıtkeni kompanııalar áli de qorshaǵan ortaǵa zııan keltirip otyr.Tabıǵatty basty basymdyq retinde qarastyratyn júıege kóshken kezde, Prezıdent aıtyp otyrǵan mindetterdi júzege asyryp, barlyq negizgi baǵdarlamalardy oryndaýǵa múmkindik alamyz. Sonda Konstıtýtsııa shyn máninde bizdiń bolashaǵymyzdy qorǵaıtyn mańyzdy qujatqa aınalady. Búginde Qazaqstannyń ár qalasynda «Taza Qazaqstan» qaǵıdattaryn qalyptastyrýǵa jáne elimizdiń turaqty damýyna úles qosyp júrgen pikirles azamattardan quralǵan qaýymdastyqtar jumys isteıdi. Aldaǵy ýaqytta bul baǵyttaǵy jumystarymyz ben jınaqtaǵan tájirıbemiz odan ári nyǵaıa túsedi dep senemiz, — degen E. Mýhamedjanov otyrysqa qatysýshylardy tsıfrlyq ekologııalyq jobalar men modeldermen, sonyń ishinde mektepterge arnalǵan arnaıy mobıldi qosymshamen tanystyrdy.

Ekonomıkalyq damý taqyrybyn Nurtaı Sabılıanov jalǵastyryp, óńirlerdiń áleýetin arttyrýdyń negizi retinde shaǵyn jáne orta bıznesti qoldaý sharalaryn júıeli túrde kúsheıtý máselesin kóterdi.

Komıtet otyrysynda atap ótilgendeı, kelip túsken bastamalar, onyń ishinde ekologııalyq jobalar, aýyldyq aýmaqtardy damytý jáne kásipkerlikti qoldaý sharalary olardy iske asyrý jáne salalyq memlekettik organdarmen birlesken jumysty úılestirý jónindegi qorytyndy josparǵa engiziletin bolady.

Aıta ketelik Qazaqstan Halyq Keńesiniń quramy men turaqty komıtetteriniń tóraǵalary bekitilgen edi.