Qazaqstan Halyq Keńesinde qoǵamdyq bastamalardy damytý komıteti jumysyn bastady
ASTANA. KAZINFORM — Búgin Qazaqstan Halyq Keńesiniń Qoǵamdyq bastamalardy damytý komıtetiniń alǵashqy otyrysy ótti. Otyrysqa Komıtet tóraǵasy Vera Kım tóraǵalyq etti. Qatysýshylar Memleket basshysynyń reformalaryn iske asyrý boıynsha óz usynystaryn aıtty.
Otyrys barysynda qatysýshylar Komıtet jumysynyń formatyn talqylap, úsh salalyq komıssııany qurýǵa erekshe nazar aýdardy. Dál osy komıssııalar bastamalardy jan-jaqty pysyqtaý jáne ózekti qoǵamdyq mańyzy bar máselelerdi sheshý boıynsha negizgi alańǵa aınalady.
Vera Kım atap ótkendeı, Komıtettiń basty mindeti – Halyq Keńesi músheleriniń qoǵamdyq jáne saraptamalyq áleýetin biriktirip, ózekti máselelerdi mazmundy talqylaý jáne naqty usynystar men usynymdar ázirleý. Memleket basshysy Qasym-Jomart Toqaevtyń alǵashqy sessııada belgilegen mindetteri aıasynda Qazaqstan Halyq Keńesiniń músheleri ózderiniń bastamalary men usynystaryn aıtty.
Bilim berý jáne adamı kapıtal máseleleri jónindegi komıssııanyń jetekshisi Murat Ábenovtiń pikirinshe, búgingi tańdaǵy basty syn-qaterlerdiń qatarynda qala jáne aýyl oqýshylarynyń bilim sapasyndaǵy alshaqtyq pen pedagog kadrlardyń tapshylyǵy bar.
Sonymen qatar oqý baǵdarlamalarynyń eńbek naryǵynyń naqty talaptaryna sáıkes kelmeýi jáne ıkemdi ulttyq úzdiksiz bilim berý júıesin qurý qajettiligi de ózekti máselelerdiń biri bolyp otyr. Osyǵan baılanysty komıssııa bul máselelerdi qoǵamdyq jáne saraptamalyq kún tártibine belsendi túrde shyǵaryp, naqty sheshimder ázirleý úshin beıindi mamandardy, jumys berýshilerdi jáne IT-sektor ókilderin tartýdy josparlap otyr. Onyń ishinde zańnamalyq bastamalar da qarastyrylmaq.
Áleýmettik saıasat máseleleri jónindegi komıssııanyń jetekshisi Lázzat Qaltaeva áleýmettik saıasat adamnyń ómiriniń barlyq kezeńin qamtıtynyna nazar aýdardy. Basym baǵyttardyń qatarynda densaýlyq saqtaý, áleýmettik qorǵaý, teń múmkindikter jáne urpaqtar sabaqtastyǵyn damytý máseleleri bar. Onyń aıtýynsha, qurylymnyń jumysy halyqpen keri baılanys ornatý jáne óńirlik tájirıbeni taldaý negizinde júrgiziledi. Al onyń basty ólshemi – ár adamnyń ómirindegi naqty oń ózgerister bolýy tıis. Onyń aıtýynsha, komıssııanyń jumysy halyqpen turaqty baılanys ornatýǵa, azamattardyń ótinishterin zerdeleýge jáne óńirlerdiń tájirıbesin eskerýge negizdelýi tıis.
Al Azamattyq qatysý jáne volonterlik máseleleri jónindegi komıssııa qoǵamdyq bastamalar men azamattyq belsendilikti damytýǵa basymdyq beredi. Azamattar, sarapshylar, bıznes, ÚEU jáne memleket arasyndaǵy baılanysty nyǵaıtý maqsatynda komıssııa turaqty saraptamalyq dıalog ótkizýdi, óńirlerde kóshpeli otyrystar uıymdastyrýdy jáne «ÚEU – memleket – bıznes» dıalog alańynyń jumysyn jolǵa qoıýdy josparlap otyr. Komıssııa jetekshisi Altynaı Kóbeevanyń aıtýynsha, óńirlik qoǵamdyq keńestermen júıeli dıalog ornatý jáne belsendi azamattar men kommertsııalyq emes sektor ókilderine arnalǵan «Qoǵamdyq qatysý mektebin» ashý josparlanǵan.
Sonymen qatar qatysýshylar komıtettiń 2026–2027 jyldarǵa arnalǵan jumys josparyn jeke talqylady. Josparǵa Komıtet pen salalyq komıssııalardyń otyrystaryn ótkizý, ýaqytsha jumys toptarynyń qyzmeti, saraptamalyq jáne qoǵamdyq talqylaýlar uıymdastyrý, taldamalyq jáne saraptamalyq materıaldar ázirleý, memlekettik organdarmen, qoǵamdyq birlestiktermen, sarapshylar qaýymdastyǵymen, ǵylymı jáne bilim berý uıymdarymen ózara is-áreket jasaý, sondaı-aq Qazaqstan Halyq Keńesi músheleriniń mańyzdy jobalary men bastamalaryn iske asyrý kiredi.
Otyrys barysynda Qazaqstan Halyq Keńesi músheleriniń ári qaraı pysyqtaýǵa usynylatyn bastamalary da aıtyldy. Atap aıtqanda, Tóralqa múshesi Baǵdat Mýsın «Taza Qazaqstan» jobasy úshin tsıfrlyq ekojúıe ázirleýdi usyndy. Komıtet jumysynyń mańyzdy baǵyttarynyń biri – qoǵamdyq usynystar salalyq komıssııalar men jumys toptarynda kásibı baǵalaýdan ótip, naqty usynystar men usynymdarǵa aınalatyn tıimdi tetik qalyptastyrý.
