«Qazaqstan Halyq Keńesi» degen ataý jańa ınstıtýttyń jalpyulttyq sıpatyn kórsetedi — Prezıdent
ASTANA. KAZINFORM — «Qazaqstan Halyq Keńesi» degen ataý jańa ınstıtýttyń jalpyulttyq sıpatyn kórsetedi. Bul týraly Qazaqstan Halyq Keńesiniń birinshi sessııasynda Memleket basshysy Qasym-Jomart Toqaev aıtty.
— Men eldegi túıtkilderdi ashyq talqylaıtyn, jurttyń usynys-pikirlerin saraptap, naqty sheshimder usynatyn arnaıy ınstıtýt qurýdy kópten beri josparlap júrdim. Onyń qurylymy, atqaratyn jumysy jóninde uzaq oılandym. Keńestiń ataýyn Konstıtýtsııalyq reforma jónindegi komıssııaǵa ózim usyndym. «Qazaqstan Halyq Keńesi» degen ataý jańa ınstıtýttyń jalpyulttyq sıpatyn kórsetedi. Konstıtýtsııaǵa sáıkes memlekettik bıliktiń birden-bir bastaýy jáne egemendik ıesi bul — halyq. Sondyqtan jurtshylyqtyń múddesin qorǵaıtyn biregeı organnyń ataýynda «Halyq» sóziniń turýy — óte qısyndy, oryndy, sebebi, bul — zańdylyq. Buǵan qosa, «Qazaqstan Halyq Keńesi» ataýy — Konstıtýtsııada bekitilgen biryńǵaı ári resmı nusqa, — dedi Prezıdent.
Memleket basshysynyń paıymynsha, bul jańa organnyń mártebesi bıik, jaýapkershiligi joǵary ekenin aıshyqtaıdy.
— Buǵan deıin eldik isterge qatysty mańyzdy mindetterdi Qazaqstan halqy Assambleıasy, Prezıdent janyndaǵy Ulttyq qoǵamdyq senim keńesi, Ulttyq Quryltaı jáne basqa da konsýltatıvtik-keńesshi organdar atqaryp keldi. Bul ınstıtýttar ózderine júktelgen tarıhı mıssııany tolyǵymen oryndady, — dedi Qasym-Jomart Toqaev.
Prezıdent Qazaqstan halqy Assambleıasy el birligin nyǵaıtýǵa ólsheýsiz úles qosqanyn atap ótti.
— Qazaqstandy beıbitshiliktiń, ózara senim men kelisimniń oshaǵy retinde jer júzine tanytýǵa yqpal etti. Qoǵamdyq senim keńesi syndarly dıalog arqyly jańa saıası mádenıetti ornyqtyrýǵa atsalysty. Al Ulttyq quryltaıdyń músheleri osy jalpyulttyq dıalogti odan ári tereńdete tústi. Bul qurylym aıasynda praktıkalyq turǵydan qundy bastamalar kóterildi. Sonyń arqasynda 26 zań qabyldandy, taǵy 10 zań jobasy Quryltaıda qaralady. Men osy sátti paıdalana otyryp, memlekettik mańyzy bar isterge belsene aralasqan, otanshyl bolýdyń ozyq úlgisin kórsetken árbir azamatqa shynaıy rızashylyǵymdy bildiremin, — dedi Memleket basshysy.
Aıta keteıik, keshe Halyq Keńesiniń uıymdastyrýshylyq otyrysy ótti. Jıynda Memleket basshysy Qasym-Jomart Toqaev Qazaqstan Halyq Keńesi tóraǵasy qyzmetine Erlan Qoshanovtyń kandıdatýrasyn usyndy.
Usynys Keńes músheleri tarapynan qoldaý tapty.
